Sui Hlei Tial(21) Ruak Hlai In Thantlang Thlanmual Ah An Thial Than

Nu Sui Hlei Tial ruak cu October 4, 2020 zan khua lengah zan hnih tluk vui cang mi cu tuzan October 6 zan suimilam 9:00pm tluk ah Quartantine an chiahmi minung (4) nih an hlai i Thantlang thlanmual ah zan deilei 4:00am hrawngah an thial than tiah theih a si.

Quarantine an chiahmi hna minung (4) nih an hlai nain a thuk deuh caah JCB an auh than nain a tlam a tling lo tiah a kalve mi pakhat nih The Chinland Post ah a chim.

Lai mi nih tonbal lo mi thil khuachung luhter lo in khualeng pi ah ruak vuimi cu thil ningcang lo a si tiah chungkhar le tuanvo ngei khuanu/pa hna nih Cozah lei rianngeitu an nawl pat hna hnu ah a tubantuk in a ruak hlai in an thial tha hi a si.

Hi kong he pehtlai in a pate Pu Kapte nih “Sui Hlei Tial (kum 21) September 29 zan (Malaysia Time 8:30) tluk ah a thih thawng kan theih cu a si. Sui Hlei Tial (a thimi) hi lengah a um a nau nu hi inn chungah a um. Cutin bia an i ruah ko. An i chawnh lo tik ah an inn pa nih an vun zuan hnawh tik ah ah cun a ruak cu inn tangah an rak um cang. Cu tin kan nau pa Pabawi, khuami dang hna nih Embassy tiang in an vun tawlrel hna. Kan mah lei nih cun COVID-19 ruangah a tlun khawh lai kan zum ve lo nain tha tein kan vun thawhpi ko e tiah an vun kan chawnh i kan mah lei nih tluang tein a tlung dingah kan ruah. A karlak ah Online ah thawngpang a kai tuk tikah COVID Committee le tuanvo ngeitu hna nih zungah an ka auh i thilsining ka chimh hna tikah zeiti hmanh in ruaktlun pi a ngah lo an ka ti ko. Tuan deuh in thawnh rak kan thanh u law Yangon hmanh ah rak vui ta ding a si hnga an ka ti i upadi ning in kan tawlrel ko lai an kan ti. Lam lak a phan cang mi cu zeitin kan tuah ti lai; mah lio ah cun Bungzung an phak hrawng a si lai. Inn chung luhpi ngah lo nan ti si cun kan sia rem tuk ko. Laipawnglung in thlanmual direct in kal pi khawh a si ko caah zaangfah tein thla ah chiahnak nawl cu rak kan pe ko u law ka ti hna. Cuti sicun hi kongah aa-ma-khang tu ding nan um lai maw an ka ti, aw kan um ko lai ka ti hna. Khah! chuak cang u law kan mah nih tuah ding cu kan tuah cang lai an kan ti i kan chuak. Pyine hmu he zong kan i chawn i Hakha hmanh hi nan lut khawh ka zum lo a ka ti. Kan Church Pastor te nih Hakha lei an theih mi hna Pastor hna kha an hei chawnh hna tikah hi thil cu a rang tuk cang i an kan ti tikah kan lungre thei Hakha phak lai hrawnghna ah maw bawmhhal in a ruak kan chiah lai i hnu deuh ah kan lak than te lai ti hna kan ruat ko cang. Hakha kan kal lai tiin Pu Ram Khar kan sawm i a herhmi kan tawlrel hnu ah Hakha nih an kan thlah. Thantlang Laipawnglung kan phak in nan lan kho rih lo Pengukzung, siibawi le palek an ra rih lai an ka ti kan hngah hna tlawmpal ah an phan ve. Kan hngah kar hna ah khan mizapi zong cu ngeihchiat lio kan ti cu minung kha kan vun tam deuh chungkhat lawngte cu kan si ko. Kha tikah COVID lio a si tikah le cozah lei duh ningin um tu zia kan rak thiam pah ve lo tiin ka ruah ve ko. Cutik ah minung kan tam tuk tikah kan nawl hna zongah a ngah lo ti bak a si ko. Nanduh si cun gate phak hlan deuh lam kuai ah khin i vui ko uh si si ko. Mah cu siibawi pa le pengukzung lutlai nih an kan ti mi a si. Motor zong kir an duh cang caah Quarantine um ding kha kan auh hna i an mah nih cun a ruak cu Thang Hrim Siazuatnak chak lam kam ah cun JCB in an cawh i an vui. A vui tu kan fa le minung 4 zong Quarantine an chiah colh an si. An vui dih tik kha cu zansuimilam 8 a luan cang lai. A tapa te kha chinchiahnak raktuah te kan ti i a tapa nih chinchiahnak ah thing ngei a rak phun tak. Aruang cu Laipawnglung ah minung kan tamtuk tik ah khan zeitin dah minung kan i ven khawh lai ti an ruah caah an kan khamnak cu a si ko.”tiah a chim.

” Ramchung ramleng in kan lungretheihnak vialte, khuaruahvannak vialte, chawva vialte a kan tanpi a kan dirpi tu Laitlai unau nan dihlak cungah kan i lawm tuk. Lai hritlai unau tanpinak thawngin Laimi hi tluk in maw an lung aa rual tiah tutan nawl an kan pek than ti zong hi za ah za kan zumhmi a si, nan cungcio ah kan i lawm tuk. Kan fanu Sui Hlei te hi a nu nih a hmeipi hna i inn le lo chia te ah khua a sa athu dirmi an si, harsa ngaimi kan si. Sui Hlei hi chungkhar nihcun arfi thlapa bantuk in kan zohthlami a si i hi bantuk thil kan ton tikah kan suktung a pur khi a si. Tutan kan tonmi cungah nanmah dirhkamhnak tampi kan herh rih ko. chungkhar nih hmurka in chim khawhlomi lawmhnak tampi kan ngei” tiah a pate Pu Kapte nih The Chinland Post ah a chim.

“Khuavelnak in kan kal ko lai tiin zeiti kan ti hna zongah an duh lo cangmi a si tikah Ramkulh ngandamnak zung kan pu nih a duhlo tiin an ti caah zeihmanh kan chim len zongah an duh lo hi a si” tiah a biapeh ah a chim.

Hi kong he pehtlaih in Thantlang COVID-19 Response Committee Chairman Thantlang penguk U Aung Shwe Myint kan chonh lengmang nain a phone a tlai lo. Peng ngandamnak zung lutlai TMO U Thun Phua kan chonh nain nanmah pumpak ra u tiah a kan ti caah thilfiang a kan chim kho rih lo. Pehtlaih kan zuam cuahmah rih ko hna.

Hi kong he pehtlai in Nu Sui Hlei Tial chungkhar bawmchantu Thantlang Sipin Chairman Pu Ram Khar nih “A vui tu minung 4 cu in kir ti lo in Quarantine ah luh ter colh an si. Thantlang Covid-19 i Runvennak Main Committee hna cu 1. Peng Uktu (Myone Ohchohzi Hmu) – U Aung Shwe Myint-Chiarman, 2. Peng Ngandamnak Zung Lutlai (Myone Cianma Zi Hmu) TMO, U Thun Pua-Secretary 3. Peng milu cazin tlai (Myone Lahwah Kah hmu) ..Member 4. Peng Fimcawnnak zung bawi (Myone Pingngazi Hmu)-member 5. Peng Palek bawi (Myone Yehmu Palek Bawi)-Member 6. Peng biaknak zung bawi (Myone Tatana Zi Hmu)- Member mah hna hi an si. Khua Nupa kan i tel lo. Sipin Committee zong kan i tel lo, Mino Bu zong kan i tel lo. Lai lei (Laitlai) minung Pakhat zong kan i tel lo. Cung lei nih mah ti ning in Committee ser uh ti maw si an mah te in an ser mi si tu hi kan thei lo. Hi Main Committee ah hin Laitlai Pakhat tal cu kan I tel hrim hrim ding si. I tel uh sih law mah bantuk thil (Piahtana) hi a chuak hrim hrim lai lo. Mah hna nih hin Kan lai Phung le Lam kan Sining hi a thei mi Pakhat hmanh an um lo. Kan Chimh hna zong ah zei ah an kan rel piak lo. Mah ti thil a hin can tik ah Ram chung ramleng kan au nak an theih ruang ah si lai 6.10.2020 ni ah Pu Lawm Bik, Pu Siang Zel, Pu Ral Tu le Tuan Vo ngei tu Cheukhat le mithi mi hna chung khar I ton nak ngeih hnu in Sui Hlei Ruak cu Thlanmual ah thialthan ding in Quarantine an chiah mi hna minung 4 le Upa 3 hrawng te he lamkam an phum nak cu an hlai i, 10:30 pm ah Thantlang No -2 Thlanhmun ah an thial cang.” tiah Thil sining fianternak a facebook a tuah.

Hi kong he pehtlai in min langhter lo upa pakhat nih “Chungkhat lei nih Peng Cozah an duh bantuk in ca an tial khawh lo zong cu aa tel ve lai nain a bik in Penguktu pa le peng ngandamnak lutlai nih khan a duh an duh lo. Zeitluk kan chim hna zongah a ngah lo an kan ti ko. A donghnak ahcun ramkulh ngandamnak zung kan pu nih a duh lo a kan ti tik ahcun chim awk a um ve tilo. Minung (4) lawng bak nih an vui, Quarantine ah an chiah beh hna. Rungrul thahnak sii zong kah a um ka thei lo.” tiah The Chinland Post ah a chim.

October 6 (ni hin) ah chungkhar lei ni khuanu/pa lei nih Cozah lei tuanvo ngeitu hna cu aruak hlai dingin le thlanmual te ah thial dingin an va nawlpat hna caah a zan lila ah Quarantine ah chiah mi hna minung 4 nih hlai in thlanmual ah an thial tha hi a si.