Surbung Tlang Vanlawng Tual 48% An Lim I 2020 Ah Vanlawng A Tum Kho Cang Lai

TCP-Hakha| 2018 November 21| Chin ramkulh Falam peng chung ah sak cuahmah liomi Surbung tlang vanlawng tual cu zatuak 48% an lim cang i 2020 ah vanlawng tumter kho ding in an i zuam cuahmah tiah Chin ramkulh Chief Minister sin in kan theih.

“Surbung tlang vanlawng tual cu atu hi zatuak 48% kan lim cang. 2020 ah lim ding le vanlawng tumter kho ding in kan i zuam cuahmah. Hmailei ah cun Kawlram lawng si lo in Singapore, Malaysia, Thailand, India he hnatlaknak kan ser lai i tlungkal kho ding in timhtuahnak kan ngei” tiah Chin ramkulh Chief Minister Salai Lian Luai nih November 19, Hakha Town Hall ah mizapi he ton biaruahnak ah a chim.

“Surbung tlang vanlawng tual saknak caah ramkomh cozah nih ks. 37billion pek a si nain Kawlram cozah budget a hnorsuan tuk ding a si caah ti, mei le lam cu nanmah ramkulh budget chung in tuan ve uh an kan ti. Cu ruang ah ti, mei le lam kong hi Chin ramkulh cozah budget in tuan a si lai. Tukum chung ah pe 2000 chung hi lungphah in kat-ta-ya kan toih lai” tiah Chief Minister nihcun a chimchih.

Surbung tlang Vanlawng tual cu rili in pe 6000 a sannak hmun ah a um i vanlawng a tliknak ding a sau pe 6000, a vaang pe 100 a si i hi Vanlawng tumnak hmun nih a rihzan pound 50,000 a tuarh ding le ATR-72 (MTOW-49604) Vanlawng phun a tum kho lai tiah theih a si.

Surbung tlang vanlawng tual cu 2013 kum ah tuahding in plan an suai i 2015 kum lawng in sak hram an thawk khawh. Surbung tlang cu Falam khua in khan riat le cheu a hlatnak hmun ah a um.

Kawlram chung ah vanlawng tual a um rih lonak le a tum rih lonak cu Chin ramkulh pakhat lawnglawnga si. Cu lawng si lo in Kawlram chung ah lam le sul a chiabik zong Chin ramkulh a si. University a ngei rih lomi zong Chin ramkulh pakhat lawnglawng a si fawn tiah kan theih.

Na ruahning rak langhter ve.. (Leave a comment)

%d bloggers like this: