Suu Kyi Nih Chinram Peng 5 Ah Facang Tun 100 Le Chiti Cuai 100 Cio A Bawmh

Tawk Tling Thang| 2019 January 22| January 20 in 22 tiang Chinram a tlawngmi Myanmar rampi ruahnak petu Daw Aung San Suu Kyi nih Chinram chaklei a tlawnnak peng 5 ah facang tun 100 cio le chiti cuai 100 cio a bawmh hna tiah kan theih.

Daw Aung San Suu Kyi cu January 20 zingka, Naypyidaw in Kalay tiang vanlawng in a ra i Kalay hnu in Chinram khuallam cu helicopter in a tlawng. January 20 zingka ah Thantlang peng, Tikir Dam le Electric mei hunnak a tuah dih hnu ah Thantlang, Hakha, Falam, Tedim le Tonzang khuami ton biaruahnak a ngeih hna. Cu ton biaruahnak a ngeihnak hna peng cio ah facang tun 100 le chiti cuai 100 cio cu bawmhnak a pek hna.

Hi bawmhnak pekmi cu Hakha, Thantlang le Falam penguk zung The Chinland Post nih kan pehtlaih hna tikah zeitindah tawlrel le thenphawt a si lai timi biakhiahnak zeihmanh kan tuah kho rih lo. A thenphawt awk ah aa laklawh ngai, a har ngai ko lai tiah an kan leh.

Tutan Suu Kyi khuallam cu; Tikir Dam le Electric mei hunnak a tuah. Hakha, Thantlang, Falam, Tedim le Tonzang khuami hna he ton biaruahnak a ngei. Hakha khuacuanhnak hmun i Vice President Henry Van Thio Parthlam (tower) hunnak a tuah. Hakha sianginn cheukhat le Hakha college a zoh.

Myanmar le India ramri pehtlaihnak a simi Rih hlei le Rih Tidil a zoh. Surbung tlang vanlawng tual sakmi a zoh. Tonzang peng, Tuikhinzang (Hakhalay) ah Daw Khin Kyi foundation nih miharsa inn 46 a sakpiakmi hna a zoh. Tonzang in Kalay ah a rak kir i Kalay Town Hall ah mizapi he ton biaruahnak a ngeih dih hnu in Naypyidaw lei ah a kir than tiah kan theih.

Na ruahning rak langhter ve.. (Leave a comment)

%d bloggers like this: