Suu Kyi Nih Pu Henry Van Thio Parthlam Hunnak A Tuah Cang
Tawk Tling Thang| 2019 January 21| Hakha Vankulh lam (Gangaw lam) cung khuacuanhnak ah sakmi Vice President Henry Van Thio Parthlam (tower) cu January 21 zingka ah Myanmar rampi ruahnak petu Daw Aung San Suu Kyi nih sunglawi ngai in hunnak a tuah cang.
Hi Parthlam hunnak ah nunphung laam hmuhsaknak le vawrhhla saknak zong sunglawi ngai in an ngei kho.
“Hakha Khuacuanhnak hmun ah sakmi Parthlam cu a min ah Pu Henry Van Thio Parthlam tiah min bunh a si. Hi khuacuanhnak Parthlam luhnak cu Lai Kutka timi “Lawng” in chon le kulh a si. Parthlam hi Vice President Henry Van Thio nih ks. sing 50 (5,000,000) hrambunh hmasa nakin sakmi a si. Hi Parthlam saknak cu cozah tangka fangkhat hmanh kan hmang lo, ramchung Chin upa hna kutsamhmi chawva, a zapi ks.64,580,000 dih in kan sak. Lai kutka timi “Lawng” saknak belte cu cozah (Sipin) budget aa tel” tiah Chin ramkulh Sipin Director Pu Thla Hre nih The Chinland Post ah a chim.
Hi Parthlam cu 2017 April 1 in Power Seven company nih sak hram a thawk. Hi Parthlam saknak caah kut a samhtu zapi hi Vice President Henry Van Thio telh in minung 64 an si.
“Parthlam chung ah chawva kutsamhtu cazin kan taar. Cun, a leng ah khin Henry Van Thio Tower tiah ca kan tial in kan taar chap rih lai. Hi khuacuanhnak Lawng Innka ahhin Chin ramkulh in bochanmi le philh awk a tha lomi upa kan thim hna lai i an zukdeu le an konglam zong tialpiak chih dih ding hi kan saduhthah a si. Hihi pehzulh in tuanchuah kan i zuam lai” tiah Pu Thla Hre nih a biapeh ah a chimchih.
Hakha khuacuanhnak hmun Parthlam saknak caah cozah tangka fangkhat hmanh aa tel lo bantuk in hi saknak ah tawlreltu zong cozah an si lo. Hakha khuami upa hna tawlrelnak in sakmi a si. Hi Parthlam saknak tawlreltu committee haotu cu Pu Thla Hre a si tiah kan theih.
Hakha Vankulh lam khuacuanhnak Parthlam le Lawng chung luh khawh caan hi zing suimilam 6:00 in zan suimilam 9:00 tiang a si. Hiti ri an khiahmi hi a chung lutmi hna nih dingrep an ngeih tawn lo caah a si. Atu tiang cu a chung luh man (fee) laak a um rih lo. Hmailei ahcun dingrep a um deuhnak ding le an sunhsak deuhnak ding ah a man laakte ding zong timhtuahnak an ngei tiah kan theih.
About The Author
