Suu Kyi; Ziknawh Eihmuarnak A Loh Lawng Ah Mizapi Budget A Firdingmi Kan Hloh Khawh Hna Lai
TCP-Hakha| 2019 January 21| Ziknawh eihmuarnak a um lo lawng ahhin rampi ah a hrampi a simi mizapi thilri, chawva le budget pawl a fir dingmi hna kan hloh khawh hna lai tiah Myanmar rampi ruahnak petu Daw Aung San Suu Kyi nih a chim.
January 20, Chin ramkulh, Thantlang peng, Tikir Dam le Electric mei hunnak ah atu bantuk in a chim hi a si.
“Firtu timi cu zaran firtu an si hna lo. Mizapi sin in, rampi sin in a firtu khi chim duhmi a si. Hihi ziknawh eihmuarnak a si. Ziknawh eihmuarnak a um lo lawng ah mizapi nih a ngeihmi thilri, chawva, budget pawl a firtu ding kan thawl dawi kho hna lai, kan hloh khawh hna lai. Hihidemocracy phunglam i a biapi hmuitinh pakhat zong a si. Democracy phunglam ruang zong ah ziknawh eihmuarnak a hlo kho dingmi covo pawl hmuh khawh an si. Hihi kanmah cozah nih kan i tinhmi pakhat a si” tiah Daw Aung San Suu Kyi nih a chim.
Myanmar ram hi thancho hram aa domhka mi ram a si caah midang nakin kan i zuam deuh a hau. Thanchonak hnu i kan taan ruang ah innpa ram pawl asilole kanmah nakin a thangcho deuhmi ram pawl tluknak caah annih lam an kal lio caan ah kan tlik a hau. Tlangcung miphun zapi sifahnak in kan luatnak ding kan mitthli a tlak lonak ding ah kan zapi fakpi in kan zuam a hau. Cu pin ah Chinram chung i thingkung hau nan hmanmi hi nan hman ti lo hrimhrim a hau tiah Suu Kyi nihcun a chim.
“Hika helicopter in ka rat tikah zeitluk in dah Laitlang thingram nan konghter cang timi ka hmuh, nan hngalh ding ah kan chimh hna. Cuaithlainak caah ka chimmi a si lo. Tuandeuh ahkhan Kachin ramkulh ka va kal i ka zoh tikah tuuhmawng pawl hmakhatte ah an hring tuk i an hmawn tukmi ka hmuh. Chin ramkulh zong ah hi bantuk in si kho seh ti ka duh”.
Chin ramkulh khuallam chung helicopter in ka tum lio ah thli fakpi in a hrang i inn cungcih le dumhau pawl a rawkmi hna caah liamrulh ding le khuacaan dirhmun ruang i ka khuallam ka hnutmi caah ngaihthiam kan hal hna tiah Daw Aung San Suu Kyi nih Thantlang mizapi he ton biaruahnak ah a chim.
Ref: MOI, DVB
