Tabayin Khualak Kahdohnak Ah SAC Ralkap 18 An Thi, Hriam Zuun 22 le Tangka Sing 340 Leng An Lak
The Chinland Post | 2024 August 21 — Sagaing ramṭhen, Tabayin khua lak kahdohnak chung ah SAC ralkap 18 an thi, dothlennak phu lei hriamtlai 4 an nunnak a liam, hriam zuun 22 leng an lak khawh leng ah tangka sing 340 leng an lak khawh tiah thawng theih a si.
August 18 zinglei sml 4:00am thawk in Sagaing ramṭhen, Shwebo pengkomh, Tabayin khua cu dothlennak phu pawl nih an lak khawh i August 15 thawk in dothlennak phu pawl nih kah hram an thawk hi a si tiah theih a si.
Tabayin khua lak kahdohnak chung ah SAC lei Captain Aung Hein Oo hruai mi IB 704 le 708, palek le pyusawhti pawl telh in thazang 79 nih hmunhma an khuar nak Tabayin khuachung palek sakhaan, GAD zung, cozah zung rianṭuantu pawl umnak, Shwe Zarli pura le Cazin cheknak zung, Zwe rawl dawr le B.E.H.S hna cu an lak khawh i Ye khua lei in bawmhnak pek ding a ra mi thazang 60 hrawng LIB 89 pawl zong dothlennak phu pawl nih an kham khawh hna.
Tabayin khua lak kahdohnak chung ah SAC ralkap 18 an thi i 10 an i hliam, adang SAC ralkap pawl an zaam, pyusawhti pahnih nih hriam chiah in a sung an pek i Non-CDM rianṭuantu 40, thongtla 20, mipi 72 zong an chanh khawh hna, SAC ralkap hriam 22, kuan 4,900 leng, bom phun 57, bomrap lung 20, kuanbawm 8 le tangka sing 340 leng an lak khawh i dothlennak phu lei 4 an nunnak a liam tiah theih a si.
Tabayin khua lak kahdohnak chung ah Shwebo pengkomh No. 1 Command hruainak in Shwebo pengkomh Battalion 6, 9, 12 le adang dang dothlennak phu pawl an i bawm tiah theih a si.
About The Author
