TABC Cup Lungler Khua Ah Tuah An Timh, Hlasatu Jenevy Sui An Sawm
Salai Elvis| 2018 March 10| Avoi 3nak TABC Cup cu Thantlang peng Lungler khua ah April 25-29 tiang tuah dingin timhtuahnak an ngei. Mah ni ah hlasakthiam Jenevy Sui an sawm tiah thawng kan theih.
Hi Cup ah cawnpiaktu ding Salai Bawi Lian Mang le Salai Ram Tin Thei zong an sawm hna pin ah hi puai ongtu ding ah Chin Ramkulh Hluttaw Speaker Pu Zo Bawi zong an sawm tiah theih a si.
“Atu kum a voi thumnak TABC Cup cu Lungler khuami nih an i hauh bantuk in sunglawi ngai in tuah timh a si. Hi puai ah khual lian in sawm mi hna cu Chin ramkulh speaker Pu Zo Bawi, Salai Bawi Lian Mang, Ram Tin Thei le hlasatu dingah Jenevy Sui an si. Zan paoh ah mino he pehtlai in cawnnak a um lai, chun paoh ah lente celhzuamnak Pa pumpululh chuih zuamnak le nu le pa volleyball bengh zuamnak a um lai. Cun a dang zuamnak tete zong a caan zohchun in tuah a si thiam lai.” tiah TABC ramchung Youth Secretary Pastor Sang Hre Lian nih TCP ah a chim.
“Mino hna hmunkhat teah thazaang chuahti in kan i hlum i kan i hawikomhnak hngading caah tuah timh a si. Laksawng le a ni caan cawlcangh ning kong tu cu kan ceih rih lo.” tiah Pastor Sang Hre Lian nih a chim chih.
TABC Cup cu a voi 1nak 2009 Thantlang, a voi 2nak 2015 Farrawn khua le a tu voi 3nak Lungler khua hna ah tuah a si lai. TABC ramchung ah Area 6 le Local 4 an um. TABC Cup cu kum 3 dan voikhat in tuah a si lai tiah theih a si.+++
About The Author
