TABC GS Thar Ah Rev. Dr Tawk Lian Bawi An Thim
Salai Elvis| 2018 May 4| Thantlang Association of Baptist Churches (TABC) ramchung hruaitu caan karlak chung General Secretary (GS) a lawngmi zaka thimnak cu May 4 TBC Hall ah an tuah. Mah ni ah Rev. Dr. Tawk Lian Bawi cu GS ah EC nih an fehter cang tiah thawng kan theih.
TABC GS thar Rev. Dr Tawk Lian Bawi cu hmaizarh thok in zung a kai cang lai i 2019 kum a voi 46nak TABC khawmpi tiang caan karlak thla 10 tluk tuan dingin a tubantuk in thim a si.
“TABC GS zaka a lawngmi thimnak thimchung bu ah minung pathum thim an si. Cu minung pathum nih cun aa tlak bik timi an thim i a tubantuk in Thantlang Baptist Church ah caantling riantuan lio mi Rev. Dr Tawk Lian Bawi an thim hnu ah TABC EC niha tubantuk in kan fehter cang. Amah cu caan karlak chung 2019 kum February TABC khawmpi tiang hruaitu a si lai i khi tikah kumthum tiang hruaitu thar thimnak a um than lai” tiah TABC Youth Secretary Pastor Sang Hre Lian nih TCP ah a chim.
TABC GS hlun Rev. Dr Za That cu CACC GS ah a kai caah a tubantuk in amah zaka a lawngmi ah Rev. Dr. Tawk Lian Bawi an thim hi a si. Cu bantuk thiam in Associate General Secretary (AGS) a raktuan mi Rev. Lal Awi zong Center Baptist Theological Seminary (BTS,USA) ah sianginn kai a kal caah amah zaka AGS ah Bungkhua Pastor Rev. Dr. Cung Bik cu February 22 TABC khawmpi ah thim a rak si ve.
Rev. Dr. Tawk Lian Bawi cu Thantlang Baptist Church (TBC) ah caan tling riantuantu pakhat a si i thlanglei Laitlang zong ah Mission Field ah kumthum rian a tuan cangmi a si.
TABC ramchung ah Pastor minung 83 hrawng an um i Local Church 4 le Area 6 a um. Khrihfabu 52 an um i Tipil member (8483) le tipil lo (14987) an um i TABC ramchung Khrihfabu chungtel minung 18074 tluk an um tiah 2018 February 22 Avoi 45 nak TABC Khawmpi General Secretary (GS) report pek mi ning in theih a si.
About The Author
