TABC Khawmpi Ah Ordination Minung 2 le Pastor Minung 3 An Pek Hna

0

Salai Elvis| 2018 February 25| Avoi 45nak TABC (Thantlang Association Baptist Churches) BM le khawmpi, Tlangrua (B) tuahmi ah TABC ramchung in Pastor in Rev. pekmi minung 2 le Pastor tling minung 3 an pek hna tiah thawng kan theih.

Tutan ah TABC ramchung in Pastor minung pathum pekmi hna cu; Thantlang Baptist Church (TBC) in Saya Tum Cem, Farrawn Baptist Church (FBC) in Saya Thawng Cung le Tikir (B) Baptist Church in Saya Thawng Ceu Thang an si.

“Tutan ah lunglawmh awkngai a si mi cu Rev. minung pahnih kan pek hna i Rev. Sui Lian Kam (JMBC) le Rev. Thla Thawng Cung (TCBC) an si. Pastor riantuannak ah kau deuh le fakdeuh in kan kal khawh nakding caah Pathian nih thluachuah a kan pekmi a si” tiah TABC, G.S Rev. Dr Za That nih TCP ah a chim.

TABC ramchung i hruainak chungah A.G.S zaka zong atu tan ah thimnak an tuah tiah theih a si.

“Hruaitu i thlen remhnak zong tutan ah kan tuah i A.G.S Rev. Lal Awi cu US ah sianginn a kai caah amah zaka kumkhat caah TABC A.G.S a thar cu Rev. Dr. Cung Bik thim a si” tiah Rev. Dr Za That nih a chim.

TABC ramchung i hruainak chungah phungphai (by law) zong an remhmi a um. Tutan khawmpi ah khual a tlungmi zapi minung 1136 hrawng an si, khuami he an zapi minung 1400 renglo an si. Tutan TABC khawmpi an tlangtar cu ‘ Pathian Duhmi Thlennak’ (Rom 12:2, II Cor 5:17, Matt 9:16-17) a si. Khuallian ah Dr. Lian Hmung Sakhong an sawm i sunglawi ngai in caan an hmang kho tiah kan theih.

About The Author

Na ruahning rak langhter ve.. (Leave a comment)

%d bloggers like this: