TABC Khawmpi Tikir Tuah DingAh Pastor Pathum Le Pension Pakhat An Pek Hna Lai

Tikir Thar, Thantlang Peng by The Chinland Post

Salai Elvis|2020 January 30| Avoi 47nak Thantlang Association of Baptist Churches (TABC) BM meeting le khawmpi Tikir (B) ah 2020 Febuary 28 in March 1 tiang tuah dingin timhtuahnak an ngei an ngei i chungah Pastor tling minung 3 le Pension minung 1 an pek hna lai tiah theih a si. Mah pin ah Ordination (Rev) tling sinak zong minung 3 pek dingin timhtuah nak ngeih a si nain, minung pazeizat dah pek an si lai timi Committee upa hna nih an zohfel lio zong a si.

“Tutan TABC ramchung khawmpi ah hin Pastor tling sinak minung 3 le kum upa cang mi Pension minung 1 pek ding an si. Pension pek ding hi Farrawn Pastor Rev. Amos a si. Mah pin ah Ordination (Rev) zong minung pathum pek dingin timhtuah an si, cu hna tu cu an pathum in maw co hlan an si te lai timi a fiang rih lo. An konglam zoh thlu an si rih lo caah Committee upa nih biachahnak an tuah te lai.” tiah TABC AGS Rev Dr. Cung Bik nih TCP ah a chim.

Tutan Tikir (B) tuah dingmi khawmpi ah khuallian le cawnpiak tu ah sawmmi Chin Baptist Convention (CBC) GS. Rev Dr. Law Ha Ling a si. Mah pin ah ramleng in Rev.

Dr. Chum Awi le Dr. Van Ni zong tlun ding in timhtuahnak an ngei. Hi TABC Khawmpi ah Mizoram Saiha um LIKBK mino hlaremh phu zong an tlung lai i TABC ramchung khuakip Hlaremh zuamnak le Solo(pakhat hla sak) zuamnak zong a um chih lai. Avoi 47nak TABC khawmpi tlangtar cu ‘Zumhtlak Sal Tha’ ti a si lai. A tu lio TABC ramchung ah Khrihfabu 53, caan tling riantuan tu Pastor 75 hrawng le Chungtel minung 18,000 hrawng an um tiah theih a si. +++

 

Na ruahning rak langhter ve.. (Leave a comment)

%d bloggers like this: