TNLA Nih Nawnghkio Peng Um SAC No. 606 Battalion le Brigade 33 An Lak
The Chinland Post | 2024 June 28 — Shan ram chaklei, Nawnghkio peng, No. 606 Battalion, Ommakha khua sakhaan, Brigade 33 sakhaan hna cu hriam tampi he an lak tiah TNLA nih thawng an thanh.
June 27 zinglei sml 10:00am hrawng ah Nawnghkio peng, Ommakha khua ah hmunhma a khuar mi SAC ralkap sakhaan cu TNLA nih an kah i an lak khawh, cubantuk in zinglei sml 11:14am ah TNLA nih an kah cuahmah lio mi Battalion 114 sakhaan cu SAC nih kahdohnak vanlawng Y-12 in bom a rak thlak, cubantuk in zinglei sml 11:00am hrawng ah SAC No. 606 Battalion cu an lak khawh i sml 11:50am hrawng ah Y-12 nih bom a rak thlak ṭhan tiah theih a si.
Cun June 26 chun sml 1:00pm hrawng ah Nawnghkio peng, Kyaukcian khua um SAC Brigade 33 sakhaan cu TNLA le MDY-PDF nih an kah i an lak khawh tiah theih a si.
June 26 zaan sml 10:00pm hrawng ah Nawnghkio khua um TNLA nih an lak cang mi IB 115 sakhaan cu SAC nih vanlawng in bom a rak thlak, Mogok peng ah TNLA nih a lak cang mi Salaung tlang le Ohsaung tlang hna zong SAC nih vanlawng in bom a thlak tiah theih a si.
Cun June 27 zinglei sml 8:30am ah Mogok peng, Aye pura ah hmunhma a khuar mi SAC Brigade 88 kuttang LIB 248 sakhaan zong TNLA nih an kah tiah theih a si.
June 27 zinglei sml 5:40am hrawng ah Kyaukme peng ah TNLA le MDY-PDF phufonh nih SAC MOC 1, IB 501, IB 502 hna zong an kah cuahmah tiah theih a si.
June 26 Kyaukme peng ah hriam chiah in a sungpe mi SAC ralkap 17 le 60MM zuun 2, Machine Gun zuun 6, RPG zuun 2, Sniper zuun 1, Pistol zuun 5, bomrap lung 5, 60MM bom, RPG le adang kahdohnak thilri tampi an lak khawh tiah theih a si.
About The Author
