Tamu Peng Region No.2 NLD In MP Candidate Aa Cuh Ding Mi Khampat Pu Hmet Al Konglam

Chelsea Bawi | TCP-Kalay| 2020 September 29| Khampat khuami Pu Hmet Al cu NLD Taing Hluttaw, Member of the Legislative Assembly (MLA) Tamu Peng No.2 ( Constituency) ai cuh ding asi i tu hi biatak tein khuami le pawngkam mi nih an cawlcangh pi cuahmah lio pi asi.

Tamu Region No.2 (Khampat Myo) hi vote 32,000 renglo a um i, cucu Thantlang Peng he ai tluk hrawng asi. Hi chung ahhin parties 6 ai cuh ding an um I hi chung ahhin NLD le USDP hi ai khingkhang ngai dingah ruah an si. Hi a ramri Tamu phak lai Thatapine in Kalay lei Tuikhal tiang khi a si lai I hi chungah hin Kawl khua 12 ah um. Cun kan unau Mizo Kanan khua pawl hi USDP leiin an mipa ai cuh lai caah vote tam ngai hui dingah ruah asi.

Pu Hmet Al Cu Ahodah Asi?

Pu Hmet Al cu Thantlang Peng, Lungler khuami Pu Lian Ci (tleicia) le Pi Sal Pam, hna I fapa upa bik asi i, Kum 1964 ah a chuak I tuhi Kum 56 a hman lio asi. Kum 1983 ah tang 10 a awng I Kum 1984 ah Mandalay University ah a rak kai (Laimi nih kan i bochan ngaimi Dr. Hai Vung Lian tepawl he khin a rak kai timi an si hna) 888 lio kha final year asi nain rampumpi buai lio asi caah sianginn dihlak khar a rak si I kum 1990 ceo ah BSc (maths) in a rak dih kho.

Khampat No.4 ah Sayakyi caansaupi a rak tuanlio ah Khampat No.4 cu cathiam tampi an chuak i, Doctor, Engineering le Lawyer tiangin a Sianghngakchia ahhin an chuak len hna. (Hihi vawleicung University thabik tahnak i an hmanh mi pakhat; hi sianginn ahhin Noble prize pa zeizat nih dah an lak cang ti khi a biapi ngaimi tahnak asi). Khampat khuabawi caansaupi a rak tuan I hi a tuan chung ahhin Khampat cu a rak him ngaingai a lamkip in.

Zeidah Khuami Le Miphun Caah Atuahmi Pawl Asi?

Pu Hmet Al khuabawi a tuanlio ahhin Khampat zuuri le sahai zong an rak king deuh, Khampat pathawng bik le tlangval pawl rual hmanh nih an zuurit lio i an hmuh hmanh ah nulepa upat tluk in an upat I a rannak in an i fimkan tak tawnmi asi. A nih Mandalay University a rak kai lio ahhin Karate a rak cawngmi asi pin ah a mah hi pumrua tha cu sikaw zenh awk hrim zong cu asi tak ve. Kanmah Laimi lawng si loin pawngkammi Mizo, Tedim, Kawl le Thado hmanh nih a thei lo an um lo. Thantlang peng i ralkap bawi sual taktak Khin Maung Gyi (A min kai palh kho men) bantuk Tamu peng nih kan zoh ve mi “Pawte” tiah a min kan sak mi ralkap sual taktak pa hmanh nih Tamu peng ahcun Pu Hmet Al lawng a ti ngamlomi asi tiah a rak chim tawn.

Pu Hmet Al hi khuabawi a tuan lio in siseh, atuan lo hnu zong ah siseh, khuami le Laimi caah rian a tuan zungzal mi asi. Kawl Rawn cu Laimi (Chinmi) hi nehsawh kan tong ngai tawn caah tlaihkhih a tongmi pawl a va chuahmi le tlawrthing le cozah thing in siseh, zeidang crimes kong ah siseh police station a phak hnu zongah a va chuh khawh lengmang kho tu ai pumpek taktak mi le sifak santlailo zawn a ruat taktaktu asi. A thil tuahmi pawl hi ca cun tial cawk asi hnga lo.

Hei Tling Sehlaw Zeidah Ai Timh Bikmi Asi?

Chinmi, a bikin Tamu peng Chinmi ko hi minung pathum ah pahnih paoh hi kan hmatpungtin le kan min hi ai luai nain an thleng kho lo, Cozah nih thlen piak zong ai timh lo caah hihi biatak tein ka buaipi hmasa bik lai, ati.
Tamu Peng Chinmi hi cozah rian kan sok ah hnawnh kan tong khun, thiamnak sangpipi an ngei ko nain zei huaha asilomi Kawl pawl tu hi an I usape deuh tawn caah ka tlin ahcun biaktak tein ka tuan chungah Chinmi hi cozah riantuan tampi chuak kho dingin ka kanh hna lai.
Khampat kan veng lawng nih leikuang acres 1800 hrawng kan i ngeih i zeimawtzat cu vanruah awr an si caah ruah a sur lo ahcun tii an i hmuh lo caah an pam tawn. Cun leikuang ringthar namding leikuang acres 1000 renglo kan i ngeih rih nain ti kong ah kan buai caah tivapi deuh lai piak kho dingin biatak tein kai zuam lai. Laitlang lei kan unau a hung pem dingmi pawl caah hihi a tha tuk dingmi asi, a ti.

Biatlang Kawmnak

“MLA (Taing Hluttaw) vai cu hi ka duhmi asi lo cuhlan te zongin an ka fial pengmi asi ko nain ka duhmi asi lo, ka tlin ahcun phaisa in vun tuak ahcun thlakhat ah ting 500,000 hi ka hmu lai i cozah nih 120,000 an phiat colh lai. Cun 70,000 tluk umkalnak caah phiat piak ka si hoi lai caah thlakhat ah ting 200,000 tluk hlawh ah ka cang hnga. Ka innlo rian vialte ka tlorh dih lai, ka lo ahhin kumkhat ah facang 15000 (Tin 3,000) ka ngei I a tlawmbik kumkhat ah ting 7,000,000 renglo peng ka chuahpi” ati. A chim than mi cu “Tutan cu harnak fakpi kan tonnmi ruah ah hi kong hi ka phisin piak kho hna hnga maw tiah hlawknak hmuh I timnak le bawi tuan huam ruang ah silo in kai timh mi asi” a ti.

(Note: Catialtu Hmuhning a si)