Tanghra Siangngakchia Cheukhat Camipuai An Dih Cang; English A Phi Kho Lomi An Tam

0

City Hunter| 2018 March 14| March 7 in thawkmi Myanmar ram pumpi tanghra camipuai cu March 14 chun in Biology le Economics a lami siangngakchia paoh camipuai an dih cang tiah kan theih.

March 14 cu siangngakchia tampi caah thaw chuah ni le inn hlam ni a si. Zei ruang ah ti ahcun Biology le Economics major a lami siangngakchia paoh an camipuai dih ni a si caah a si. Art major a lami siangngakchia paoh cu March 16 lawng ah camipuai an dih te lai. March 15 khi Geography subject an phi lai. March 16 khi History subject an phi lai i hi ni cu Myanmar ram pumpi ning in tanghra camipuai dih ni a si lai tiah theih a si.

“Tukum camipuai phit cu nikum sin ahcun a nuam tuk cang, ca aa firmi an um ti lo caah. A thiammi awn le a thiam lomi sungh kan si ko cang lai. Zeidang subject cu ka phit khawh dih. Asinain English question hi a har tuk i ka lungduh in ka phi kho lo, awnnak mark tu cu ka hmuh ko lai. Ka sianginn kaiti ka hawile paoh cu English hi kan phi kho lo, kan sung men ko a kan ti” tiah tanghra kumhnih a nolhmi siangngakchia pakhat nih The Chinland Post ah a chim.

Hakha ah Tanghra English cachimtu pakhat nih, “Tukum kan fale hi zeidang subject cu an phi pah kho dih ngawt ko. English question belte hi tanghra siangngakchia phit ding cun a har ngaite. English in siangngakchia tamtuk an sungh sual lai ti ka phang. Ka siangngakchia bochan deuhmi le English in marksang (distinction) a hmu lai ti kaa ruahchanmi hna zong an mithmai a panh lo i zeidah an lawhte hnga ka thin kaa dom ko” tiah The Chinland Post ah a chim.

Pyidawtha No.3 siangsangrun ah camipuai a phimi siangngakchia pakhat nih, “Nihin cu camipuai kan dih ni zong a si i ka phi kho ngai. Asinain English hi ka phi kho lo tuk, awnnak mark ka hmuh ding a har ko. Chemistry zong ka phi kho set lo” tiah mithmai chia nawn in The Chinland Post sin ah a chim.
Tanghra camipuai a dongtu hringtu nu pakhat nih, “Nihin cu kan fale camipuai dih ni a si i tampi kan thaw a chuak cang lai. Camipuai an phit chung cu an phi kho sual lai lo ti thinphan thlalau lawng si lo in taksa hrimhrim zong kan re a thei. Rianpi pakhat kan i lim tluk ah khin ka ruah. Awnnak le sunghnak cu Pathian kut a si ko” tiah The Chinland Post ah a chim.

Tukum tanghra English question hi a biapi in Grammar a har tuk. Letter le Essay zong hi tanghra ca cun a harmi question a si tiah kan theih.

Chinram tanghra siangngakchia tamdeuh cu Biology le Economics deuh an la, art major a lami cu an tlawm. Cucaah Chinram tanghra siangngakchia cheuli ah cheuthum tluk cu March 14 in camipuai an dih cang tiah kan theih.

About The Author

Na ruahning rak langhter ve.. (Leave a comment)

%d bloggers like this: