Tanintharyi Chief Minister Dr. Lae Lae Maw A Rian An Phuah I Thong Kum 15 Tlak Khawhnak Upadi In Taza An Cuai

TCP-Thantlang| 2019 March 12|

Tanintharyi ramthen Chief Minister Dr. Lae Lae Maw cu President nawlpeknak in eihmuarnak phunli in a rian an phuah i an tlaih, Dawei thonginn ah an hren i thong kum 15 tlak khawhnak upadi in taza an cuai tiah kan theih.

Dr. Lae Lae Maw lawng si lo in Global Grand Services (GGS) Company lutlai minung 3 zong tlah chih an si tiah eihmuarnak doh tu Committee nih thawngthanhnak an tuah. Eihmuar dohtu phu hna nih hi hna pawl cu February 4 in March 6 tiang Naypyitaw, Yangon le Dawei khua ah ngiatthlainak an tuah hna hnu ah a tu bantuk in an tlaih hna hi a si.

Hika ah 7Day News nih thawngpang an thlahmi video zoh khawh a si.

 

Dr. Lae Lae Maw cu khual a tlawnnak Kawh-taung ah tlaih a si hnu ah ahmuh (Case) an hunnak ding Dawei thonginn ah kuat colh a si bantuk in GGS Company minung pathum zong cu thonginn ah an hren chung hna. March 25 ah zung chuahpi in chekhlat an si lai. Dr. Lae Lae Maw nih a eihmuarnak an hmuhchuah ning cu; Tender auh lo, a mah nawl in Dawei Airport thianhlimhnak tuah ding in Company pakhat cu sing 4000 rian a pek hna nak kong, Rampi cozah nih nawlpeknak um lo in lamzung sin ah Ks. 1.9 Billion a mah nawl in tangka a chuahpiak hna nak kong. 2016 April thla kawlti toih puai mandat saknak, Dawei University chung thianhlimhnak, a vapa min in a hmun a cawk mi cu tlakrawh in a kulhkharnakter hna pin ah Dr. Lae Lae Maw te innchungkhar nih ngeih mi inn sing 320 man cu a letruk tam in cu GGS Company sinah sing 2000 in a zuarh hna i GGS Company cu rian ngan le tangka tam mi paoh ah a papek tuk hna nak kong eihmuar dohtu phu hna nih an langhter.

Dr. Lae Lae Maw le GGS Company lutlai minung 3 cu eihmuarnak upadi pohmah 55 ningin report an tuah. Hi pohmah cu a sang bik kum 15 thong thlak khawhnak a si.

Dr. Lae Lae Maw kongah President zung chimnak nawlngei mi U Zaw Haty nih, “ hi kong he pehtlai in zaangfahnak le dawtnak timi a um lai lo. A tu cu kan hrenchung rih hna. Eihmuar dohtu Committee nih an hmuhchuah hna ning tein le FDA Director bantuk in kan tawlrel ko hna lai” tiah a chim.

Chief Minister dirhmun in eihmuar kongah tlaihmi cu Dr. Lae Lae Maw pakhat lawng a si rih. Caankarlak Tanintharyi ramthen chief minister cu ralkap palai in U Mint Maung tuanvo pek chung a si. NLD cozah chungah Chief Minister dirhmun in amah duhthim tein rian dinhter mi hna cu 2017 February thla ah Mon ramkulh Chief Minister Min Min Oo le 2018 January thla ah Irrawady Ramthen Chief Minister Man Yor Nyi an si.
Ref: VOA, RFA, Mizzima

Leave a Commnet

%d bloggers like this: