Taungphila lamṭhen kahdohnak ah SAC ralkap 2 an thi, 3 an i hliam
The Chinland Post | 2022 May 31 – Sagaing ramṭhen, Kalaymyo, Taungphila lamṭhen ah hmunhma a khuarmi SAC ralkap pawl cu May 28 zaan sml 8:00-10:00pm tiang CNDF, CSS, UG, PDF battalion 8, PDF battalion 12 le GRF phufonh hna nih an kah hna tiah CNO/CNDF nih May 30 ah a thanh.
Cu kahdohnak ahcun, SAC ralkap 2 an thi i 3 nih hliamhma an tuar tiah theih a si.
SAC ralkap nih hriamngan in kah thlorh a kah ruangah Tahan sang chungah hriamngan a tla i mipi 3 an thi.
Cun, May 29 ah Chin ramkulh, Falam peng, Zawlpi khua lei ah a kalmi CNDF hriamtlai 2 cu SAC ralkap nih an kah hna caah Zawlpi khuami 1 le CNDF hriamtlai 1 an nunnak a liam i an ruak pawl cu SAC ralkap nih an khangh beh. CNDF hriamtlai pakhat zong hliamhma a pu tiah CNO/CNDF thawngthanhnak in theih a si.
