TCF Nih Thit Umnak Tuah Tikah Biakinn Tamh Tuk Lo Le Kawi Le Maw Tamtuk Lo Ding In An Kham
Salai Elvis| 2019 January 29| Thantlang Christian Fellowship (TCF) nih a thiangmi thitumnak tuah tikah Biakinn a hleihluat tamhtuk lo ding le Kawi le Maw tamtuk lo ding timi pawl tel in chiatni thatni kong zong kham mi tete biachahnak an ngei tiah kan theih.
Thitumnak kongah, “A thiangmi thitumnak cu Khrihfabu kip nih tha an peknak kong, Living together, ngeihkhat thitumnak, Biakinn chungah i hnamh, mizapi hmai ah i hnamh hna cu TCF nih tuah lo dingin fakpi in an dohnak kong, Biakinn chung le Biakinn leng vampang tibantuk ah hmanthlak tar lo ding, Reception (kuttlaihnak) hmun zongah i hnamhnak hmanthlak tar lo ding, A hleihluat tuk in Biakinn tamh lo ding (kalnak lam i puan sen phah, thutdan i pangpar tar le puanzam, innka bantuk in pangpar in tuah le ser tibantuk), Kawi le Maw tamtuk lo, Lehthah dih i inn leng lei kuttlaih tikah minung tlawm deuh le a biapi deuh lawng kuttlaihnak i dir ding, a thiangmi thitumnak cu tangka deuh in i tlawmh ding le a thianglo mi thitumnak cu Reception um lo ding” tiah TCF nih an khammi le tha an pekmi kong biachahnak an ngei tiah kan theih.
Chiatni (thih loh nak) “ruak suannak kongah zinglei suimilam 8:00 hlan i a thimi (khual ah a thi mi si lo mi) cu a ni ah ruak vui ding, zinglei 8:00 hnu i a thimi zong chungkhar lei nih a ni i vui ding an hnatlak ko ah cun vui ding, Bawi le chia thleidannak um lo in (ihkhun cung ih ter ding, thutter lo ding, Lai phung tuah tawn ningin tuah lo) zapi ruaksuan ning i rual seh, Ngakchia kum tlinglo ruaksuannak le vuinak kong tu cu Doctrine (zumh ning) he aa pehtlai mi a si caah mah le Khrihfabu kal ning zulh deuh in fimtawl ding” hna an si.
Ruak i vuinak kongah, “Zuu a zuarmi hna kong cu Centenary Declaration ning in zulh si ko seh (Zuu zuar mi hna cu Khrihfa bu in chuah an rak si bantuk in an ruak zong Khrihfabu nih vui lo ding), thlanlung i Cuaipia phah cu TCF nih tha an pek lonak kong, Zatlak puicimh le kokek harnak kongah TCF nih bawmhchanh nak le i zohkhenhnak kong tuanvo lak ding, thit camtuak (sathah le rawlhrawmnak) cu Khrihfa sinak in tha an pek lo nak kong zong biachahnak an ngei chih.
“Mah kan khammi le biafunnak kan ngeihmi cu kanmah TCF nih kan khammi an si hna i na tuah hrimhrim lai tiah nawlpek cu a si lo. Kanmah nih tha kan pek lomi le kan khammi cu a si ko” tiah Pastor Duh Sang nih TCP ah a chim.
A cunglei kan langhter mi hna cu TCF nih chiatthatnak kong he pehtlai in Seminar an tuah lio ah biafunnak an tuah mi chungah a biapi deuh tiin kan lak mi an si. TCF cu Thantlang khuachung Khrihfabu 22 fonh in funtomnak a ngei mi bu an si i a tu lio an hruaitu bik cu Pastor Dr. Duh Sang (TBC) a si tiah kan theih.
About The Author
