Tedim A Pakhatnak Bik Mizaw Pa A Zawtnak A Thiang Cang; Voi Hnih Tiang Negative A Si Hnu Lawngah Siizung In An Chuah Ter Lai

TCP-Thantlang| 23 April 2020| Kawl ram chungah COVID-19 a pakhatnak bik Kaptel khua, Tedim siizung ah thlop mi cu a zawtnak a thiang (Negative) si cang nain a voi hnihnak tiang Negative a si hnu lawng ah siizung in chuah ter a si lai tiah Tedim siizung uk Dr. Zaw Myint Naing nih TCP ah a chim.

Mah mi pa cu a zawtnak a thian le thian lo a thi voi 5 tiang an chek nak ah a zawtnak a thiang rih lo (positive) a si peng. A si nain a voi 6 nak lawng ah a zawtnak a thiang (negative) a piah hi a si.

Tedim ah thlop mi a pakhatnak bik mizaw pa cu zawtnak a ngeih hnu le an thlop ni 31 hnu ah a zawtnak a thiang cang tiah April 24 ni ah a tu bantuk in an theih hi a si.

“Negative a si cang tiah thawng kan theih ve, Online zong ah an lawmh pinak ca tete an tial mi zong kan hmuh, a si nain biadik a si le si lo kan chim kho rih lo ramkulh ngandamnak zung ah thawng kan hal in kan hngah lio a si ve.”tiah vuanci Pau Lun Min Thang nih TCP ah a chim.

A mah tel lo minung 4 hna cu an zawtnak a thian rih lo caah Positive an si rih, a sin nain an dih lak in ngandam tein an um hna tiah kan theih.