Tedim ah Covid-19 zawtnak hmuhchap; Chin ramkulh ah dihlak 3 an um cang

Chin ramkulh Tedim ah a pathumnak kum 49 nu sin in COVID-19 zawtnak an hmuh chap. Nihin tiang Chin ramkulh ah Covid-19 in a zawmi minung pathum an hmuh cang hna.

Ministry of Health and Sports nih April 11 ah Tedim ah pakhat, Shan ramkulh Taung-gyi in pakhat le Rangoon ah pakhat – dihlak minung pathum kan hmuh chap hna tiah April 11, 2020, Kawlram caan zan sml 8:00 ah thawng a thanh.

An hmuh chapmi nu hi kum 49, nu a si. Anih hi avoi 1nk bik an hmuhmi US in a rak tlungmi pa Kalay in Tedim lei a kal lio ah a tlunnak inn ngeitu a si. March 25 in Tedim siizung nih an zohfel hnu ah atu bantuk in Covid-19 an hmuh hi a si.

Kawlram cozah thanhnak ah nihin tiang Kawlram ah Covid-19 zawtnak a ngeimi minung 31 an si cang. Cu chung ah minung pathum an thi i pahnih an dam than tiah a thanh.

Vawleicung huap in April 11, 2020 Kawlram caan in zan sml 8: 45 tiang ah zawtnak a ngeimi dihlak 1,769,542 le a thimi dihlak 106,419 an si. A dam thanmi dihlak 380,681 an si tiah World Health Organization (WHO) nih cazin a langhter.