Tedim khua ah ramvaihnak in a rak kirmi mino 2 SAC ralkap nih an thah hna
The Chinland Post | 2022 May 24 – Lai meithal he ramvaihnak in a rak kirmi Chin ramkulh, Tedim peng, Saizang khuami 2 cu SAC ralkap nih an tlaih hna i an thah beh hna tiah khuami hna nih RFA ah an chim.
Thah a tongmi Ko Paung Za Maung le Ko Paung Sun Thang hna cu Hmwa khua pawng ramlak ah ni 6 chung ram an vaihnak in an rak kir ni May 21 ah Sakaw lam sang ah SAC ralkap pawl he an i tong i an tlaih hna hnu ah an thah beh hna hi a si tiah chungkhar he aa naihniammi nih RFA ah an chim.
“An mah he ram a vai ṭimi pawl cu an hmai ah an kal chung caah an luat manh. Lai meithal he an si caah CDF ah an rel hna i an tlaih hna. Inn an phak ti lo caah an hlathlai cu an thi tiah theih a si”.
CDF chungtel ah an rel hna caah an thah hna hi a si tiah a chim.
SAC leiṭang online thawngzamh pawl nih cun khuami 2 hna hi CDF chungtel an si i an hriam he ruak in tlaih an si tiah an langhter.
A thimi chungkhar he aa naihniammi nih cun ram a vai sawhsawhmi mipi an si ko tiah an chim. A thimi Ko Paung Za Maung hi kum 29 a si i Ko Paung Sun Thang hi kum 21 lawng a si rih.
RFA nih cazin a lak khawhmi ning cun hramhram in uknak lak a si hnu ah SAC ralkap kahdohnak ruangah Chin ramkulh ning in a thimi 200 deng an si i Tedim khuami 6 an i tel tiah a langhter.
About The Author
