Tedim Khua, Kanedi Tlang Cung Ah A Um Mi Ralkap Sakhaan An Lak, Ralkap 10 An Zaam, 5 An Thi
The Chinland Post | 2023 November 21 — Chin ramkulh, Tedim peng, Kanedi tlang ah hmunhma a khuar mi ralkap sakhaan cu PDF-Zoland nih November 21 zing sml 6:00am hrawng ah an kah i sakhaan an lak khawh tiah PDF-Zoland lei nih an chim.
Kanedi tlang sakhaan ah ralkap 30 hrawng an um i sakhaan lak kahdohnak ah ralkap lei a thi mi an um bantuk in sakhaan a zaamtak mi zong an um tiah theih a si.
“Kanmah lei nih Operation kan tuahnak hi ni 2 hrawng a si cang, kahdohnak hi sml 2 hrawng a rau, ralkap lei ruak 5 kan char, cheukhat kan tlaih hna, a zaam mi 10 leng an um, kanmah lei thinphan awk um tuk lo in pakhat aa hliam” tiah PDF-Zoland rianngeitu nih The Rili Voice ah a chim.
Kanedi tlang lak kahdohnak ah PDF-Zoland nih hriamngan tampi telh in hriam tampi an lak khawh tiah theih a si.
Kanedi tlang hi Kalay-Tedim lam cung ah a um i India-Myanmar ramri lam cung ah a um mi zong a si. Cun Kenedi tlang hi Chin ramkulh chaklei ah a sang bik tlang a si bantuk in cu tlang in Kalaymyo le Falam khua hei hmuh khawh a si caah kahdohnak ah a biapi tuk mi hmunhma zong a si.
