Tedim Khuachung Ah Kahdohnak A Chuak, SAC Nih Van Lei In Kahdohnak A Tuah
The Chinland Post | 2024 May 27 — Chin ramkulh, Tedim khuachung ah May 26 zaanlei thawk in nihin zinglei tiang kahdohnak a chuak i SAC nih van lei in kahdohnak a tuah caah mipi an i hliam leng ah biakinn le mipi inn pawl zong a rawk tiah theih a si.
Tedim khuachung um SAC ralkap sakhaan pawl cu PDF-Zoland le Chin Brotherhood phu nih an kah hna hi a si tiah khuami nih an chim.
Kahdohnak ruang ah May 26 zaanlei le nihin (May 27) zinglei ah van lei in bom a thlak i mipi 2 fak ngai in an i hliam tiah khuami pakhat nih Khonumthung Burmese ah a chim.
“A biapi in Laylone, Lay-taw-tan sang le SAC ralkap nih hmunhma an khuar nak hmunhma pawl ah kahdohnak a chuak, SAC lei nih Y12 in voi 8 bom a thlak. Tuzing ah Jet vanlawng in voi 3 bom a thlak, mipi inn tampi a rawk, CCJ Hall zong a rawk ngai” tiah Tedim khuami nih Khonumthung Burmese ah a chim.
Tedim khuachung ah kahdohnak tuah lo ding in khuami cheukhat nih a luancia ni tlawmpal ah khuachung lampi hna ah a bu in thla an cam in an i chawk.
Kahdohnak a chuah hlan ni tlawmpal ah Tedim khuachung um SAC ralkap sakhaan pawngkam a um mi mipi le khuami cheuli cheukhat cu an zaam bantuk in kahdohnak a chuah hnu ah khuapi ning ngawt in an zaam hna tiah theih a si.
Tedim khua ah Tonzang khua in ralzaam 3,000 leng an i dor nain atu bantuk in kahdohnak ruang ah an zaam chap hna tiah theih a si.
Hmanthlak- Tedim Post
About The Author
