Thai ram ah phungning loin a lutmi Myanmar rammi 20,000 deng tlaih an tong

The Chinland Post | 2022 June 15 – Tukum chungah Thai ram ah tlaih a tongmi phunglut lo Myanmar rammi 20,000 hrawng an um tiah Foundation of Education and Development (FED) phu nih a chim.

Thai ram ah a thli tein a lutmi hna hi a caancaan ahcun an nunnak tiang himnak a um lomi dirhmun an tong tiah FED phu chungtel U Min Oo nih a chim.

“Broker (puai-sa) pawl nih an auh hna i an i tonnak an an pumh hna. Thongpakun lei, Mesauk ramtang hna ah an thuh hna. Palik nih cuka hmun ah an tlaih hna, a silole pawngkam nih thawng an thanh hna tikah tlaih an tong. Cu chungah, a zaam ruang an  mawṭaw hna aa let. Voi tampi ton a si. A ratnak lamcung ah an thaw a pit tuk i nu pahnih hna cu an thi i lam ah an hlonhtak beh hna. An mawṭaw hna lamthlang ah a tla, lam cungah thah behnak dirhmun tiang hna an phan”.

Thai Lah-wah-kah zung ah tlaih a tongmi Myanmar rammi an tam chin caah eidin le umṭhutnak lei buainak lengah dam lo caan thlopnak nawl zong an sung tiah a chim.

Ralkap nih hramhram in uknak a lak hnu ah Thai ram ah a thli tein rianṭuan a timmi hna cu kahdoh a tam khunnnak Sagaing, Magway, Chin, Karen le Kayah ram in a tambik an si.

Covid Zawtnak le ramchung buainak ruangah harnak a tongmi mipi hna cu Thai ram ah a lamkip in a thli tein luh a si i, rianṭuan dih hnu ah tangka khon i leiba cham a si tiah Thai ram ah rian a ṭuanmi Myanmar rammi Thida Win nih a chim.

Tlaih a tongmi Myanmar rammi hna hi Thai ramri ah a ummi Mesauk, Kanchanaburi, Yanaung ramri lei in a lutmi an tambik tiah FED phu nih an chim.

Phungning loin a lutmi hna hi Thai ram ti chuahnak rian, innsaknak lengah sinum le cinthlaknak dum hna ah a tambik rianṭuan a si. An thlahhlawh hi thla 1 ah Thai Baht 10,000 in 15,000 tiang hmuh a si. Phungning loin rianṭuanmi an si caah Life Insurance le rianṭuantu covo hna an ngah lo.

Covid zawtnak le hramhram uknak hnu ah Myanmar ram mipi 1 million and 600,000 hrawng rianngei loin um a si i rampi minung i a cheu leng a simi 25 million hrawng cu 2022 kum dongh cun mangṭam an tong kho tiah International Labour Organization (ILO) nih a ruahdamh.

Na ruahning rak langhter ve.. (Leave a comment)

%d bloggers like this: