Thai ramri a lonhmi Myanmar ranmi 250 hrawng tlaih an tong

0

The Chinland Post | 2022 May 5 – Covid rai ruangah kumhnih leng phih a simi Thai-Myanmar ramri hlei on ṭhan ding in Thai le Kawlram timhtuahnak an ngeih lioah phungning loin Thairam lei ah Myanmar rammi phungning loin an lut thluahmah. May 1-4 tiang hmunhma 4 ah phungning loin luh aa timmi 250 hrawng tlaih an tong.

Covid zawtnak aa thoka in kumhnih leng phih a simi Thai-Myanmar ramri hlei on ṭhanding in ram hnih timhtuahnak an ngei. A tu bantuk lio caan ah Myanmar ram sipuazi le ramkhel lei a that lo caah rian kawl in Thai-Myanmar ramri ah a phuphu in phungning loin luh aa timmi Myanmar rammi nifatin in tlaih an si. May1-4 tiang phungning loin a rak lutmi 250 hrawng tlaih an si tiah Myanmar rammi kong he pehtlai in a cawlcangmi U Moe Kyo nih a tu bantuk in a chim.

“Thai le Myanmar ram hnih fonh in ramri gate pawl on ṭhan an i tim tiah a thawng a thang ngai. Thai lei zong nih ngandamnak lei, thianhlimhnak lei le himnak lei kong caah timhtuahnak a ngei. Myanmar ram lei zong nih thianhlimhnak a tuah i ram hnih ning in hlei on ṭhan an i timhtuah lioah a tu bantuk in phungning loin an rak lut thluahmah. 2022 May thla thlakhatnak ni 4 chungah 250 hrawng tlaih an tong.

A luancia January le February thla chungah phungning loin a lutmi 10,000 hrawng tlaih an tong i March thla chungah 10,000 hrawng tlaih an si. April thla chung zongah 1,700 hrawng tlaih an si tiah Moe Kyo nih a chim.

“a luancia thla chungah phungning loin a lutmi Myanmar rammi 1,704 le phungning loin thil a zuarmi 14 tlaih an tong.

A tu cu Thai nih security a rengh deuh i tlaihkhih zong a tam ko nain Myanmar rammi a phuphu in tlaih an si lengmang caah Thai Minister of Home Affairs nih fak deuh in a ziizut  ding le ngandamnak himter ding in nawl a chuah.

Phungning loin luh ruangah Thai ram ah tlaih a tongmi 60,000 hrawng an si cang tiah Migrant Labour Development Network nih cazin a langhter. Cu chungah, Myanmar rammi an tambik tiah VOA nih a langhter.

About The Author

Na ruahning rak langhter ve.. (Leave a comment)

%d bloggers like this: