Lungkua Chung Ngakchia Chanhtu Thailand Tilio Thiam Pakhat A Thi

Salai Vahui | 2018 July 6 | Lungkua chung ah a taangmi ngakchia minung 13 chanhchuah dingah aa zuammi tilio thiam hna chungin pakhat cu lungkua chung in a chuah lei ah a thi.

Ngakchia minung 13 cu June 23 in lungkua chungah an chuak kho ti lo i nikua a rauh hnu ah tilio thiam hna nih ngakchia 13 cu nungdam in an hmuh hna.

Mae-sai lungkua ah chanhchuahnak a tuah liomi tilio thiam pakhat a si mi Thailand ti ralkap bawi hlun pakhat a simi Saman Gunan cu lungkua chung in leng a chuah lei ah oxygen nih a dih ruang ah July 6 zing suimilam 2:00 hrawng ah a thi tiah ralkap bu nih July 6 zingka newspaper ah an thanh.

Gunan hi lungkua chungin a chuahlei ah a thih hi asi. A ruak hi a umnak khua lei ah kan kalpi i Thailand Siangpahrang pumpak in a va zoh kho men tiah kan thieh i hi chanhchuahnak zong hi kan pehzulh ko lai a ti tiah theih a si.

A thimi Saman Gunan (kum 38) cu anmah Thailand ram mi asi. Gunan cu lungkua chung ngakchia chanchuahnak ah oxygen dur a pechantu a si. Sihmanhsehlaw, lungkua chung in leng a chuahlei ah oxygen aa kenmi nih a dih tak caah tang ah a tla i a thawh a dih. A hawile dang nih chanhchuah an zuam ko nain an chanhchuah manh ti lo.

Lungkua chung ah a ummi ngakchia 13 cu leng ah chuahpi khawh an si rih lo caah lungkua chung ah an herhmi sii-lei thlopbulnak le eidin an pek hna. Lungkua chung in chanhchuah khawhnak ding an i zuam cuahmah lio a si. Zeitik ah dah an chanhchuah khawh te hna lai timi hngalh khawh a si rih lo.
Ref: 7day news Journal

Na ruahning rak langhter ve.. (Leave a comment)

%d bloggers like this: