Thailand Ngakchia Minung 13 An Luhnak Lungkua Tuanbia
TCP-Thantlang| 2018 July 3| Minu a ih lio muisam bantuk in Thailand ram, Chiang Rai pengkomh Mae-Sai khua pawng ah a ummi Doi Nang Non tlangtluan pakhat a si. Hi lungkua (minung 13 an tlaunak hmun) tuanbia cu Shan siangpahrang fanu he aa pehtlai ngaimi a si tiah Me-sai khuami upa hna nih an chim.
Aluancia kum 400 renglo ah khan Shan siangpahrang fanu le siangpahrang a rang congtu pa cu an rak i uar caah Doi Nang Non (a tu lungkua) ah hin an rak zaam. Aruang cu nu le pa lungtling lo in aa uarmi an si caah an zaamnak hi a si. Cu tikah an pahnih cun i daw ngai le nuam ngai in, cu tupi chung le ram lakah cun an um i ngaknu nu cu nau a pawi colh caah umnak tha an ngeih lo i lungkua pakhat chungah cun an um.
A va pa (siangpahrang rang cong) tu pa cu lungkua lengah ei din a kawl hawlnak ah siangpahrang i rangcung ralkap hna nih a vapa cu an hmuh caah an thah. Cu tikah a ngaknu nu nih a vapa cu a tin bal lo caah lungrethei in a hngah lio ah a nau ngan cu fak chin lengmang cang. Cu pin ah a kawltu hna rangcung ralkap hna zong lungkua kam an rak phak kha ngaknu nu nih cun a theih hna tikah ngaknu nu cu amah le mah lung tum in a lu aa cum. Cun tikah Doi Nang Non lungkua cu alang hlat in zoh tikah minu pakhat a ih lio bantuk muisam a cuangmi in hmuh a si. Cu ruang ah khuami hna zong nih siangpahrang fanu a thimi muisam a si tiah an chim i an ruah thai.
Doi Nang Non tlang le lungkua cu chaklei siangpahrang fanu tiah a zum i a biami zong an um. Hi lungkua ah hin mizei paoh an kal ngam lo. A ruang cu tupi hmawng tang a si tikah an tih, lungkua zongah an rak lut ngam hna lo i hi ngaknu min in rai an rak thawi hnu le an conglawmh hnu lawng ah lungkua chungah an rak lut ngam. Lungkua a lutmi cheukhat hna zong a chungah lam a tlau i a chuak kho tilo mi hna zong an rak um tawn.
June 23 ni ah ngakchia pumpululh chuih phu le an saya pa tel in minung 13 zong an lut ve i a tubantuk in an tlau venak hi a si. Hi ngakchia minung 13 cu Thailand cozah nih biatak tein ramdang he i bawm in an kawl hna i a nihra nak July 2 zan suimilam 10:30 tluk ah an hmuh hna hi a si. Asinain an hmuh le cangka in lungkua chungin an chuah kho rih hna lo, i lungkua chung tu ah a herhmi ngandamnak le tirawl tling tein mi bawmchantu hna nih an kenpiak hna.
Ngakchia hna lungkua chung in chanhchuah khawhnak ding an i zuam cuahmah liopi a si. Chanchuahtu ding hna nih lungkua chung in chuah khawhnak ding caan a rau kho rih tiah an chim.
Chanchuahtu dingah Thailand cozah lawng si loin, US, Australia, British le Tuluk ram tel in vawleicung lungkua lei thiamsang hna nih chanhchuah dingin a lam an kawl. Lungkua luhnak in pe 2300 aa hlatnak tikam ah Thai cozah in tilei chanchuahtu bu nih hmun zong an khuar cang.
Ref: Tachileit News Agency/ Yomalan.com
About The Author
