Thairam mawṭaw Accident ah Chinmi pa pakhat telh in Myanmar rammi 4 an thi
The Chinland Post | 2022 August 18 – Thai ram, Nakhon Si Thammarat pengkomh, Tulapon peng August 17 ah phunglut lo Myanmar rianṭuantu a phormi mawṭaw pakhat a ke kuai i thingkung a pah caah Chinmi pa pakhat telh in 4 an thi i 3 an i hliam tiah Thai media 77kaoded nih a langhter.
Tulapon peng, Samtanbon sang ah a ummi No. 41 lamcung i zinglei sml 11:00am ah mawṭaw Accident a cang i mizaw phor mawṭaw he an va zoh tikah lam kam thinhkung pakhat a pah i a letmi mawṭaw pakhat kan hmuh tiah Tulapon palek nih thawng latu pawl a chimh hna.
A rawkmi mawṭaw chung in a hliammi, a pawngkam i a tlurilmi an zapi 7 an si i 3 cu a hmun ah an thi colh i a taangmi 4 cu a naihnak sizung ah an kalpi colh hna i hma a pumi pakhat cu sizung a phak tlawmpal lo ah a thi colh ve i an zapi 4 an thi tiah aa ṭial.
Hma a tuarmi pakhat nih a chimnak ahcun, mawṭaw cungah Myanmar rammi 33 an i tel i Malaysia ram ah rianṭuan dingin Yanaung khua in aa rak thawhmi an si i mawṭaw ke a kuai ruangah lam kam thingkung kha fak piin a pah tiah a chim.
Mawṭaw chungin a hma fak tuk lomi 20 leng an zaam bantukin mawṭaw mawngtu pa zong a hma he a zaam ve tiah a chim.
A thimi Chinmi pa hi Kalaymyo, Indogone sang ah khua a sami Pu U Lian (Kum 20) hrawng a si i a fanu pakhat le a nupi a tantak hna. A ruak rak kuat ṭhan ding in a chungkhar hna nih an tawlrel lio tiah theih a si.
About The Author
