Thaizing Ah Committee Ser Le Serlo Ding Biakhiahnak An Tuah Cang Lai

TCP-Hakha| 2019 February 5| Phunghrampi Remhnak Bawmchantu Committee sernak ding biatung chuahpimi cu February 5, Pyidaungsuh hluttaw tonpumhnak ah MP 30 fai nih an ceihmai dih hnu thaizing (February 6) hluttaw tonpumhnak ah committee ser le ser lo ding hluttaw palai hna nih biakhiahnak an tuah cang lai tiah kan theih.

Phunghrampi remhnak Bawmchantu Committee sernak ding biatung a ceihmaitu MP tamdeuh nih committee serding an duhnak le ser hrimhrim a herhnak kong an ceihmai. Hi a ceihmaitu ah Chinram in MP Nay Lin Aung le MP Pu Lal Min Thang an i tel ve.

Magwe ramthen in MP U Aung Kyi Nyunt nih a biapi biatung in a chuahpimi 2008 phunghrampi upadi remhnak rian khulrang in tuanchuahnak caah “Phunghrampi Upadi Remhnak Bawmchantu Committee Pakhat” cu aa tlakning in Pyidaungsuh hluttaw palai hna he ser ding in Pyidaungsuh hluttaw a forhfialmi cu thaizing (February 6) ah tuahdingmi Pyidaungsuh hluttaw tonpumhnak agenda ahran ah an telh. Pyidaungsuh hluttaw speaker U T. Khun Myat nih a ceihmai dih hnu ah hluttaw palai hna nih committee ser le ser lo ding biakhiahnak an tuah lai.

“Hi biatung hi rammi caah a biapi tukmi a si. 2008 Phunghrampi ah Phunghrampi Remhnak Bawmchantu Committee nan ser lai timi pohmah a um lo bantuk in nan ser lai lo timi pohmah zong a um ve lo. Cu ruang ah Magwe ramthen in MP U Aung Kyi Nyunt nih a chuahpimi biatung hi rammi zapi, tlangcungmi zapi thatnak le rampi thanchonak ding hmuitinh in a biapi tukmi a si caah ka dirkamh” tiah Chin MP U Nay Lin Aung nih a chim.

Committee ser ding in hnatlaknak an ngei kho te lai maw ti hi mizapi nih an cuanh cio. Hi process cu committee ser ding in hnatlaknak an ngeih hnu ah committee sernak kong ah ralkap pawl an buai kho rih. Cu dih in cu sermi committee hna nihcun zeibantuk upadi pohmah pawl dah remh ding an si lai i zeitindah remh an si lai timi an tawlrel dih hnu ah Pyidaungsuh hluttaw ah upadi ahran in chuahpi le ceihmai than te ding khi a si tiah kan theih.

February 5 ah tuahmi hluttaw tonpumhnak ah MP pakhat nih, “Hi committee ser dingmi nih rian an tuan dingmi hi a caan rikhiah a herh” tiah a chim.

Hi biatung cu ralkap palai MP hna nih upadi tuahtuanning he aa kalh an ti caah ahohmanh nih an ceihmai lo. Asinain, ralkap palai hna nih 2008 phunghrampi remh kan duh lo timi biafang pakhat hmanh an chim lo. Runvennak ralkap lutlai Senior General Min Aung Hlaing zong nih phunghrampi remh ding ka cohlan ko tiah media sin ah a chim.

“Hi biatung ceihmaimi vialte cu hluttaw nih felfaite in record ah kan chiah dih lai. Thaizing tuahdingmi Pyidaungsuh hluttaw tonpumhnak ah pehzulh in kan ceihmai than lai” tiah Pyidaungsuh hluttaw speaker U T. Khun Myat nih a chim.

Leave a Commnet

%d bloggers like this: