Thantlang ah Inn 2 A Kang; Upa Pakhat Le Ngakchia Pa A Kangh Chih Hna I Nu Pahnih Sii Zung An Phan
Photo: IPRD, Thantlang
Salai Elvis| 2020 January 12 — Thantlang Sianginn sang JMBC Biakinn kam a um mi Pu Sui Peng inn le Pu Kep Tu inn cu Janaury 12 zantim 1:50 tluuk ah inn hnih (2) ningin a kang i a tubantuk in minung pahnih a kangh chih hna i nu pahnih sii zung ah an um tiah theih a si.
“Inn an kanghnak kam um Pu Ngun Buai te coka zong a tlaih chih nain an phalh (hmih) manh. Inn hnih cu an thilri zeihmanh chuah manh lo in a ciam dih. Mei hi Pu Kep Tu inn in aa thok mi a si i zeitin dah aa thok ning a si timi fiang in theih a si rih lo” tiah mit hmu mi pakhat nih a chim.
Mei aa thoknak inn, in a thimi hi Pu Chun Lian kum (80) hrawng le Pa Simon tangli hrawng kai lio mi te an si. Mah pin ah inn ngei tu nu bik le a fanu Fom Mawi zong hliamhma tuar in Thantlang sii zungah an um lio a si. Pu Sui Peng te chung cu thlalang awngka in an zuan manh caah aa hliam mi an um lo.
“Fom Mawi nu au kha ka theih le ai vel mi ah ka rel hna i ka ihnak thlaawng ka in ka zoh hna cu a ceu tuk tikah ka chung le ka thangh colh hna. Cun ka U nu nih Meithahnak zung Phone a chawnh colh hna. Lam ah ka chuak i ka au tlawmpal ah inn cu a tlaih dih cang.” tiah an inn kam um mi le mit in a hmu tu nu pakhat nih The Chinland Post ah a chim.
Inn ngeitu a si mi Pu Chun Lian cu Thantlang pelek nih pah (7/2020)Za-ya tat-kyi pohmah 304(a), 338, 285 in Case( a hmuh) an tawlrel lio a si. A thi mi pahnih hna cu tuzanlei 2:00 ah a hnu bik ruakvuinak tuah a si lai.
A tubantuk in 2020 kum ah a voi khatnak bik Thantlang khuachung nih kangh-uhnak an ton zong a si.
About The Author
