Thantlang Ah Private Sianginn Thar Pahnih An Dirh

0

Salai Elvis| 2019 March 19|2019 kum chung in Thantlang khua ah a voikhatnak bik SMART Private School le Chinland Flower Private Middle School tiin sianginn thar pahnih an dirh tiah thawng kan theih.

SMART Private School hi Technical le Teaching methodologies cu Amazon Private School nih a bawmh i cachim tu ding saya/ma te hna zong tha tein Training pek an si cang. Chinland Flower Private Middle School cu Believer Church tang ah a ummi a si.

SMART Private School nih Summer English Course cu April 1 in May 10 tiang an tuah chung lai. English Course cawn dingin ngakchia minung 16 nih min cazin an pek cang. Sianginn kai taktak cu June thla in an thok te lai. May thla dongh lei June thla zarhhnih nak tiang lawng sianginn ap nak Form cohlan a si lai. Hi sianginn ah tanghnih tiang kai khawh a si lai i a hmun cu sianginn sang thlanmual lampial nak Rev. Biak Kam inn hmun zawn ah sianginn an sak lai tiah kan theih.

“Hi sianginn kaimi ngakchia thlah donnak kong zong motor in a si lai, May thla chungah hin Motor zong cawk kan timh. Register tuahnak kongah hin Amazon he riantuanti ding kan ti caah October thla Amazon Triennial Meeting tikah khin tuah a herh le herh lo a fiang te lai. Kan i tinhmi cu Vawlei cung huap in mirang ca hi a biapi tuk mi a si caah an hmet tein thiam kho hna seh. Vawlei cung Level in kan kal khawhnak ding ah mirang ca hi kan thiam a hau ko. Fimcawnnak lei ah tawhfung pakhat a si ti kan ruah caah a tu bantuk in kan fa le caah kan i tinh hi a si” tiah Board Of Director Rev. Duh Sang nih TCP ah a chim.

Chinland Flower Private Middle School zong April -thal in sianginn luhnak Calling later tuah a si lai i May thla canceo hrawng in sianginn kai an si te lai. An sianginn cu Lungler lam a tu lio BOH ngakchia cacawn nak hmun ah a si lai.

“Thantlang peng ah hin Private sianginn kan herh tuk caah kanmah Khrihfabu zong biatak tein thla kan cam i a tu cu cozah nih tuahnak nawl an kan pek cang. Sianginn thilri zong kan tlamtling pah dih cang. Hi sianginn ah tang 5 in tang 8 tiang kai khawh a si lai. Siangngakchia lei nih luhman le thawh bur zeizat dah an pek lai i Subject pa zeizat dah an cawn lai a fiang rih lo. Cun BOH kan timi  ngakchia ca zohnak kan tuah mi he hin aa dang mi a si. A tu lio ah minung 130 an si i an mah dang tein an um in an pehpeng ve ko lai” tiah tiah Believer Thantlang District GS F. Thang Fung nih TCP ah a chim.

About The Author

Na ruahning rak langhter ve.. (Leave a comment)

%d bloggers like this: