Thantlang Ah TSDP Pumpululh Chuihzuamnak An Tuah Lai

Salai Elvis| 2018 June 21|ย June 28 in July 4 tiang Township Sport Development Program (TSDP) timi min bunh in Thantlang khua ah pumpululh chuih zuamnak an tuah lai tiah theih a si.

Hi lentecelh zuamnak ah pumpululh chuih zuamnak, minung 2 veve Tannis tuknak le Mini Marathon tlik zuamnak an si lai.

“Zaanglek lei ah thangcho u si ti saduhthahnak he tuahtimh a si. Hi pumpululh chuih zuamnak pahnihnak laksawng tiang a um lai i, pakhat ah Seal le tangka ks. 300,000, pahnihnak medel le tangka ks.200,000, Tannis tuk pakhatnak laksawng 70,000 le pahnihnak 50,000 pek an si lai i Mini Marathon tlik zuamnak ah pakhatnak in pathumnak tiang a um lai” tiah Thantlang peng zaanglek zung lutlai nih TCP ah a chim.

Mah lentecelh zuamnak ah aa tel ding hna cu Sangthen 3, Zungkip fonh le fimcawnnak zung (sianginn he fonh) tiin phu 5 an i tel lai i luhman ah phukhat 30,000 pek a si lai tiah theih a si.

Pumpululh celh zuamnak chungah anmah le an umnak cio chung in thiamhlei laksawng minung panga zong pek chih an si lai tiah theih a si.

June 28 ah zanlei 1:00 ah hunnak tuah a si lai i Mini Marathon tlik zumanak cu zinglei 6:00 in Lamtonnak in Laipawnglung- Laipawnlung in lamtonnak tiang tlik zuam a si lai.

“Marathon tlik zuamnak hi a thawng bik minung pahra thim an si lai. Hi chungah a thawng bik timi pathum a hlei in laksawng pek an si lai i a tangmi 7 zong lawmman laksawng pek chih an si fawn lai” tiah zaanglek zung lutlai nih a chim.

Hi lentecelh zuamnak cu tukum in Thantlang khuachungah avoi khatnak bik an tuah a si lai tiah theih a si. +++

Na ruahning rak langhter ve.. (Leave a comment)

%d bloggers like this: