Thantlang Ah Zuu Phurtu Pathum Riantuan Terding Le Thlali Thongthlak Ding In Kalay Ah An Kuat Hna Lai

Salai Elvis| 2019 May 20| 2019 May 15 ah Thantlang khuachung cozah zung tuanvo ngeitu hna le sangchung khuabawi i bawm in phungning lo zuu chiakha a zuar i a phurtu minung pathum tlaih an si i Kalay thonginn ah riantuanter ding le thlali chung thongthlak dingin biaceih zung nih May 16 ah bia a chahpiak hna tiah kan theih.
May 15, chun suimilam 11: 45 tluk ah Sangthen No.3 ummi Pi Ngun Chin (kum 38) a inn chungah phungning lo OP zuu Plastic in fun 16 le a tan an hmuhchuah caah a mah cu (Pah) 83/2019, Chin Act upadi 38 ning in dantat aa huah. Mah ni lila ah Thantlang khuachung luh lai, Laipawnglung ah tuanvo ngeitu hna nih khualtlawng mi chekhlatnak an tuah than hna tikah Bungtlang khua mi Pu Val Kim (kum 40) nih salaeih in tuammi caku bawm chungah OP thol 24 le Salen khua komh ummi Uk Bawi (kum 25) sin in caku bawm chung thiam ah OP thol 17 tlaih an si. Val Kim cu (pah)84/2019, Chin Act upadi 38 ning le Uk Bawi zong (pah) 85/2019, Chin Act upadi 38 thiam in dantat an si” tiah Thantlang peng palek zung in theih a si.
Anmah pathum cu Thantlang thonginn ah an hren chung lio hna a si i May 22 ni ah Kalay thonginn ah an kuat than hna lai tiah theih a si.
Zuu tha lo zuarzamhnak kong he pehtlai in 2019 April 29 Vice President Pu Henry Van Thio a voi linak Thantlang khua a phak lio ah Khuanu/pa hna nih “zuu deu/tha lo khuachung ah a luh lo nak ding le an zuar lo nak ding caah tawlrel piak ding” in an rak hal zarh hnih tluk ah a tubantuk in tuanvo ngeitu hna nih chekhlatnak an tuah hna i an tlaih hna hi a si.
Thantlang khuachung phungning in Zuu lisence ngeimi inn thum zongah chekhlatnak tuah an si nain zuu tha lo le zuu deu phunphai cu hmuh a si lo nain phungning lo in zuu zuar mi le a phur mi hna sin tu ah a tubantuk in an tlaih hna hi a si.
Atu bantuk in Thantlang peng Tikir khua zong ah Vice President nawlpek nak in phungning lo ramleng lei zuu tha lo a lut mi pawl fakpi in kham ding le chek hlatnak tuah dingin 2019 May 13 ni ah tuanvo ngeitu palek le khuabawi Pu Lian Thang nih lunghrinh mi inn le dawrkhan ah chekhlatnak tuah a si nain phungning lo zuu a lutmi hmuh a si lo tiah kan theih.
Hmailei zongah pehzulh in phungning lo zuu phur le a zuartu hna cu tlaih le upadi ning in dantat ding tuanvo ngeitu hna nih tawlrel an i tim than tiah kan theih.