Thantlang BEHS No.1 Sianginn Hall An Sakpiak Hna Lai
Salai Elvis| 2018 July 26| Thantlang khua BEHS No.1 sianginn ah meeting tuahnak le a dangdang herhhai tuahnak Hall a um lo caah cunglei fimcawnnak zung lei nih Hall tha ngai sakpiak an timh hna tiah theih a si.
“October thla chungah ramkulh cozah lei nih Tender an auh te lai i an sak colh ko lai. Hi inn saknak caah rampi cozah budget a si lai ti ka zumh i a tangka fang in zeizat sat a si lai zong ka hngal rih lo. Sianginn nih meeting le a dangdang herhhainak kip ah Hall kan ngei lo. A tu kan hman chung mi Hall khi cacawnnak khan a si caah a tubantuk in pe 100 x40 ngan, tlakrawh inn in a thar an kan sakpiak lai” tiah BEHS No.1 Sianguk Ing Cem nih TCP ah a chim.
Mah Hall saknak caah tuanvo ngeitu hna nih ramkulh vuanci sin le Hluttaw palai Pu Bawi Khing sin ah rak chim le rak hal a rak si. Thantlang khuachung ah sianginn 6 a um i BEHS No.1 sianginn ah kum khat ah a buaktlak in voi 20 tluk meeting le a dangdang herhhai caah an sianginn khan cu Hall ah an hman tawn. Atu lio 2018 cacawn kum BEHS No.1 sianginn ah cachimtu saya/mah 44 le zungriantuan dang minnung 8 an um i siangngakchia 1,392 an um tiah theih a si. +++
About The Author
