Thantlang Chin Miphun Ni Tuahnak Ding Hmunhma Ah Khuami A Phan Bal Lo Mi An Tam

Thantlang kum 72nk Chin National Day CND Hmunhma/TCP

Salai Elvis|2020 January 20| A kum 72nak Chin ramkulh huap in Thantlang khua ah tuah dingmi Chin Miphun Ni cu khualeng ah um mi hlanlio Hangbo bualrawn ah tuah dingin timhtuahnak ngeih mi chungah khuami  a tam-u nih a hmunhma a phan bal rih lo mi an tam tiah kan theih.

“Tukum Chin Miphun Ni cu ramkulh cozah nih Thantlang ah an tuah lai ticu kan hngalh. Chaklei certual a thar ah an tuah lai tizong kan hngalh ko nain a hmun tiang a phan mi an tlawm lai. Keimah pumpak zong nih ka phan bal rih lo. Mino tamdeuh hmanh nih kan hngalh in kan phanh lo mi cu Upa le nu nau nih cun an hngal chin lai lo.” tiah TYA EC mino pakhat nih TCP ah a chim.

“Hi hmun cu lam a bi, motor i kianhnak zongah tihnung ngai a si, lam thar a si pin ah kat-ta-za ai phah rih lo caah a khu ngaingai ding a si. Zan ah mino hna ca zongah a tha lo. Nu tar pa tar le nu nau hna kal khawhnak hmun a si lo. Mizapi kal kho hna seh ti an duh ah cun khualai Lalluai certual ah kan thial piak hna seh. Chin Miphun Ni cu mizapi duhnak in a chuak mi a si caah cunglei bawi pakhat hnih duhnak in kan tuah ding a si lo.” tiah khua upa pakhat nih a hmuhning le zapi au aw tiin pumbak facebook Account ah a tar.

“Mizapi tam deuh an chim ka theih mi ah hmunthar ah Chin Miphun Ni tuah dingin an duh lo nak kong biasi an phai pah, a ruang cu duh ning bantuk in kan site lai lo, a nuam deuh  lai lo, kan kal huam pek lai lo an ti i kam khat lei ah cun thanchonak pakhat a si budget zong tampi an suai mi a si le tiah a ruat mi zong um an  si thiam.”tiah TYA President Pu Tuan Uk nih a chim.

“Hmunhma kongah hin chaklei khi a hmunhma a tha, minung 3000 renglo caah tuak mi a si i thutdan hi 1,800 tlum ding in timhtuah a si. Thutdir nak zong a zalong deuh fawn. Cun khika hmun tuah hnawhchannak pakhat cu hmunthar a si tikah Ti, Mei le Lam vialte zong sersiamnak ca zongah a tha lai tiah pumpak ka ruahnak a si. Motor zong a tam lai caah khuachung Lal Luai certual ah cun cawlcanghnak a bi deuh. Thantlang peng caah cun kan i za ko hnga nain a tutan cu Ramkulh huap in tuah ding a si caah le ramkulh tuanvo ngeitu hna zong nih an suaisam hnu ah chaklei Hangbo certual hi an lungtlin mi zong a si. Khua mi chiah/thlah nak caah motor zong hlan le tawlrel kan i tim ko” tiah khuanu/pa tuanvo ngeitu Pu Ngun Hram nih TCP ah a chim.

Tutan Chin Miphun Ni ah Hmuhsaknak (piah-khan) 18 tluk a um lai. Zaanglek lei, nuamh hneihnak, khualtlung kongkau tuanvo la tu, Humhimnak lei le a dangdang kongah Committee ser a si i Khual 1,000 renglo phan dingin timhtuah nak ngeih a si. +++

 

Na ruahning rak langhter ve.. (Leave a comment)

%d bloggers like this: