Thantlang Datsii Zuar Cheukhat Leiba An Cham Hna Lo Rungah An Dawr Tiang An Khar
Salai Elvis| 2018 June 28| Thantlang khua luhlai nak datsii zuar cheukhat hna sin ah a ba in datsii aa rawnmi hna leiba cham an hngalh lo ruang ah datsii cahnak ngei lo in an dawr tiang a kharmi an um cang tiah theih a si.
A ba in datsii aa rawn i leiba cham an hngalh lo ruang ah an zuar ding Kawl lei cahnak ding zat hmanh tangka an hmuh lo caah minung pathum nih an dawr tiang an khar nak hi a si.
“Kum 3 tluk datsi ka zuar cang, phoh-te zong ka ngei i cu hna nih cun datsi cu a ba in an laak tawn. Hi chungah a fel i a ka pe mi zong an um ve ko nain a tuni tiang pe duh lo in a ummi an tam. Cazin in ka tial ningah minung pakhat nih ks. 100,000 in ks. 170,000 tiang a ba mi zong an um i 60,000 tibantuk a bami an tambik. An ka batmi hi sing 10 renglo a si cang” tiah Khualhringtlang lam datsizuar pakhat nih TCP ah a chim.
Atu bantukin leiba cham lo ruangah dawrthum a kharmi cu Khualhringtlang lam a zuarmi hna an si. A ba in datsii an cah hna i a man an pek khawh hna lo tikah Motor nih datsii a thlak duh ti hna lonak hi a si.
“Kan tlanglam ah datsii a zuarmi hi 11 hrawng kan si. Micheu cu a huam lo i a dawr a hlawt cangmi zong an um i dawr thum hi leiba pek an hngalh lo ruang i a dawr khar mi an si. Atu ah minung 4 hrawng lawng dawr a ongmi kan si cang. An rat chiar leiba kan cawh hna ah kan ngei rih lo an kan ti peng. Leiba cham a hngal lo mi hna cu cazin chungin kan hnawh hna i datsii zong kan pe duh ti hna lo. Aba in an kan latu hna nih an kan cham lai tiin a ba in Kawl lei a kalmi motor cu kan cah ve hna tikah an kan pek hlei ve lo ahcun motor ngeitu hna zong hmai khah cawk an si ve lo. An kan thlak duh lo nak zong hi an mawh ve bak lo. A ruang bik cu a ba in datsi rawnmi nih an kan cham ve lo caah a si” tiah Khualhring tlanglam Datsii zuar nutung pakhat nih TCP ah a chim.
Thantlang khualuh lainak kip ah phungning le License ngei in datsii zuar an um cio hna i leiba cham lo ruangah dawr khar tiang a tongmi hna cu Khualhring tlanglam datsii zuar lawng hi an si rih. Thantlang khuachungah datsii zuar minung 40 tluk an um tiah theih a si. +++
About The Author
