Thantlang Dinti Lak Mi Khan (4) Tluk Ti A Phan Cang

Salai Elvis| 2020 Febuary 3| Thantlang khuapi nih meng 20 leng a hlatnak hmun ah Dinti an lak mi cu an laknak hram in khualei kap khan 4 (meng 4) tluk ah ti an phanh pi cang tiah theih a si.

“Dinti laknak in meng li chung ti a phan cang. Ti lam um tuning (design) tu thlen remh mi a um than. Tuan deuh ah cun Tihna in khua tiang ah meng19 le 6 falong a si mi kha a tu ah cun lam let than a si i meng 24 hrawng a sau. Cun thir-pape in thlen a hau, cu zong cu tuni hrawngah a hmun an phak pi lai i riantuan pehtzulh a si ko lai. Riantuan ka hma a kal ko ahcun tu thla chung (Febuary)15-16 hrawng ah cun khua a phan kho lai tiah ka ruah.”tiah sipin Committee Pu Biak Tha Cung nih TCP ah a chim.

Thantlang khaupi nih dinti an lak mi cu Thantlang in meng 24 tluk aa hlatnak hmun Sihcang le Hrianghnang kar Khuaiva ti lak a si. Hi dinti lak mi cu suimilam 24 chungah Gallon 180,000 tluk a chuak lai tiin ruahchung a si. Mah tilak cu a ralai mi Thantlang Chin Miphun Ni zongah hunnak tuah ding in timhtuah a si.

“Lampi ah hin ti thazaang(control) nak ti inn pahnih a um, Cun khuachung ti phawtzamhnak ding caah tikhonnak Gallon 150,000 tlum zong Phungki sianginn hnulei ah sak a si i an lim pah cang a chinchinh lawng aa duh cang. Hi dinti an laknak tidil lak mi cu suimilam 24 chungah ah Gallon 180,000 hrawng a chuak lai tiah ruahdamh a rak si ko i a tu lam pi ah a chuak cangmi ah a zeitluk dah a tla kho taktak timi tu cu kan tah rih lo caah a fiang taktak rih lo. Khuachung ti phawt zamhnak kong tu cu riantuan ning suaisam a si rih lo caah chim khawh a si rih lo cu karlak tu cu keimah ruahnak ah mah le sang cio ti khonnak(zi-kaan) cio ah pek chung a si rih lai ka zumh.”tiah a cunglei upa nih a chim.

Mah dinti laknak caah 2018-2019 tangka kum ah Chin ramkulh cozah nih a dangte pek mi 1.2 billion le Na-ta-lah nih 0.6 billion a zapi 1.8 billion pin ah 2019-2020 tangka kum ah 1.1 billion a chap than hna i a dihlak Kyats 2.9 billion (sing thongkul le thongkua) dih in ramkulh sipin tlangtlaknak in 2019 September thla ah riantuan hram an domh hi a si.++