Thantlang Dinti Lakmi Febuary 16 Hrawngah Thantlang A Phan Cang Lai

Salai Elvis|2020 Febuary 12|

Thantlang khuapi caah Dinti lak mi cu Khan (meng) 16, Khuafo khualu tiang ti a phanh pi cang i Chin Miphun Ni hlan Febuary 16 hrawng ah khua a phanpi cang lai tiah theih a si.

Dinti laknak hi Thantlang in Khan (meng) 25 a hlatnak hmun ah a si i Ti laknak in khan(meng) 16, Khuafo khualu cu Febuary 11 zan suimilam 11 ah kan phanh pi khawh cang. Thantlang kan phak lai nak ah Khan (meng) 8 hrawng a tang.” tiah a hmun ah riak mi le tuanvo ngeitu simi Pu Biak Tha Cung nih TCP ah a chim.

Lam pi Ti khonnak kan tlak ter mi chungah zungli ti Pape ah hin a khat tein a tla kho rih lo, a ruang cu Lampi ah thli a um rih pin ah ti cu thla khat/hnih lo ah cun caan hman tein a chuak kho rih lai lo tiah Engineer te nih an chim mi zong a si. Cun ti lam hi ai ngerlh tuk tik ah a pehnak ‘ L ’ a tlam tlin thlu rih lo ah cik in Wearing-show ding hmun 100 hrawng ah a um i minung pali nih cucu an tuah lio a si, ni thum hrawng cu an rau rih lai i Febuary 15 hrawng ah an dih ko ah cun ti kan vun pek tik i kan pehnak Show-kat hrawng in a poih lo ah cun ni 16 hrawng ah cun khua kan phak pi te ko lai. Cu i Show-kat apoih sual a si cun a poi ngai lai Chin Miphun Ni hman kan phak pi kho lai lo.”tiah a cunglei upa nih a chimchap.

Thantlang khaupi nih dinti an lak mi cu Thantlang in meng 25 tluk aa hlatnak hmun Sihcang le Hrianghnang kar Khuaiva ti lak a si. Hi dinti lak mi cu suimilam 24 chungah Gallon 180,000 tluk a chuak lai tiin ruahchung a si. Mah tilak cu a ralai mi Thantlang Chin Miphun Ni zongah hunnak tuah ding in timhtuah a si.

Mah dinti laknak caah 2018-2019 tangka kum ah Chin ramkulh cozah nih a dangte pek mi 1.2 billion le Na-ta-lah nih 0.6 billion a zapi 1.8 billion pin ah 2019-2020 tangka kum ah 1.1 billion a chap than hna i a dihlak 2.9 billion dih in ramkulh sipin tlangtlaknak in 2019 September thla ah riantuan hram an domh hi a si.