Thantlang Dinti Laknak Ramkulh Sipin Department Nih Rian An Tuan Lai
Salai Elvis| 2019 April 4| Thantlang khuachung dinti laknak ding caah Company tender auhmi cu pakhat hmanh nih an ngah lo caah ramkulh sipin Department nih tuanvo lak in rian an tuan cang lai tiah kan theih.
March 30 ni ah riantuan dingin Company Tender hunnak tuah a si, a sok tu Company pathum cu an dih lak in an sungh caah a tubantuk in ramkulh sipin Department nih tuanvo lak le riantuan ding in biachahnak an tuah hi a si.
“Riantuantu ding Company Tender an sung dih. A soktu Company pathum an si i pahnih hi Profile ah an sung i pakhat hi Price ah a sungh ve caah ramkulh sipin tu nih tuanvo lak in rian an tuan lai. Survey hi zarhthum an tuah rih lai mah hnu ah rian an thok te lai. Tukum chungah cun rian an thok khawh ti lai ka zum lo, riantuan nak thil le ri an i damh tik ah cun a caan a um ti lo” tiah Thantlang sipin Committee Chairman Pu Ram Khar nih TCP ah a chim.
Thantlang khuapi dinti laknak ding caah Chin ramkulh cozah nih a dangte pek mi Budget 1.2 billion le Nah-tah-lah nih 0.6billion a chap piak hna caah a zapi 1.8 billion dih in rian an tuan lai. Hi dinti laknak ding cu Thantlang khua in khan(meng) 25 tluk aa hlat nak Sihcang khua le Falam peng Hrianghnang khua karlak Khuaiva ti lak an timh hi a si.
About The Author
