Thantlang Dinti Laknak Riantuan An Thok Bal Lo Caah Khuami Cheuhkhat An Lungrethei
Salai Elvis| 2019 March 25| Thantlang khuachung dinti laknak rian cu 2018-2019 tangka kum ramkulh cozah budget le Nah-tah-lah i bawm in riantuan dingmi cu tuni tiang rian an thok rih lo caah khuami cheukhat an lungrethei tiah kan theih.
“Tu ni tiang riantuan an thok rih lo caah zungkip fonh meeting tuahnak zongah biahalnak tuah an si nain ramkulh cozah nih tlaihmi a si caah kan thei rih lo tiin an kan le. Ramkulh tuanvo ngeitu hna nih tuni tiang rian an thok rih lo caah kan lungre a thei ngai cang. A ruang cu thal caan ti har lio tein rian an domh lo ah cun furpi kan phak lai ah thla hnih te lawng aa duh cang. Mah hi kongah zeibantuk thawngpang hmanh kan theih lo caah kan lungre a theih hi a si”tiah Thantlang khuachung sangthen khuabawi hna nih TCP ah an chim.
Tukum chungah dihti laknak ding cu Thantlang in meng 25 tluk aa hlatnak Sihcang khua le Falam peng Hrianghnang khua karlak Khuaiva ti a si i riantuantu ding Company Tender an auh lio lawng a si rih tiah kan theih.
“Hi dinti laknak ding caah Tender kan auh lio a si. Tu thla 27 in kan khar cang lai i April 5 in Tender hunnak kan tuah lai. Hi dinti laknak rian cu Company lei in Survey a tuahmi ahohmanh an awng lo. Survey tuahtu Company 2 zong an ngol than. A ruang cu Budget a tlawm pin ah Thantlang in meng 25 tluk aa hlat caah riantuan an ngamh lo hi a si. Tutan Tender awng mi Company hmanh nih Survey a tuah than ding dirhmun a si” tiah Sipin vuanci U Soe Htet nih TCP ah a chim.
Thantlang khuapi dinti laknak caah Chin ramkulh cozah nih a dangte in pekmi Budget 1.2 billion le Nah-tah-lah nih 0.6 billion a chap than caah a zapi 1.8 billion dih in rian an tuan lai. Thantlang sii-inn pi telh in sangthen cheukhat cu kumchiar te dinti an rak har peng i tukum zong sangthen cheukhat cu zinglei le zanlei dinti pek pengmi zong ti hna a that ti lo caah nikhat voi khat lawng ti pekmi sang an um manh cang tiah kna theih.
