Thantlang Hotel Zone Saknak Ding Hmun Ekah 11 Daw Tin Tin Lwin Pek A Si Cang

Salai Elvis| 2018 May 22| Thantlang khuachung ah Hotel le khualtlawng lei a tlaitu Daw Tin Tin Lwin nih Hotel Zone saknak ding in Thantlang khuami sin i hmun a halmi hna cu fehternak an ngei i ekah 11 tluk hmun an pek cang tiah thawng kan theih.

May 17 ah a tubantuk in Thantlang khuanu/pa le Pastor cheukhat tel in tuanvo ngeitu hna i ceih dih hnu ah hmun an pek hi a si.

“Ekah 11 kan pek cang i aa lim pah dih ko, a herhmi theihpinak (thoh-khan sar) zong a laak dih cang. Asinain a hmun cu anmah ta taktak a si lai lo. Nizan tihni Vice President kan ton zongah anmah he biahrennak (sar-choh) hna tuah te u an kan ti i kum 30 maw tuah a si lai ti cu a fiang rih lo. Anmah hrim nih hi hmun hi kan i lak thai lai lo i a zuar zong kan zuar lai lo nanmah ca thiam ah a tla ko lai an kan ti ve. A hmunhma rup in inn a sak te lai. Hi chungah tilionak, thiamtahnak le a dangdang zong tuah a timh chih” tiah hi kongah tuanvo ngeitu Pu Lawm Bik nih The Chinland Post ah a chim.

“Hmun kan peknak a pawngkam ah dum ngeitu minung pathum an um i an pathum ning in ekah 8 le cheu an ngeih i hmun a lawngmi tak cu ekah 2 le cheu lawng a si tikah amah Daw Tin Tin Lwin le dum ngeitu hna kha zeitin an i chawnhbiak cu kan hngal lo nain dum ngeitu hna nih an pek chih caah ekah 11 ah a tla i cu vial cu pek a si. Mah Hotel Zone a sak dingmi hi aa lak thai lai lo, a tuah chung lawng amah ta a si lai” tiah sipin Committee Pu Nawl Ceu nih TCP ah a chim.

Hi inn a saknak thawng in Thantlang khuachung rianngei lo mi hna tampi rian hmuh le thathnemnak a pek hna lai tiah upa pakhat nih a chim.

“Mah Hotel a saknak thawng in rian ngei lo minung tampi rian a pek khawh hna lai. Hotel inn lawng si lo in Training phunphun a tuah chih lai saya te zong ka cah dih cang hna tiah a chim. A bik in Laimi nih sunhsakmi thilpuan tah, hriamnam tibantuk serchuah, le a dangdang kutzung thiamnak lei tampi a tuah chih lai. Amah nih a zin le thilri a cawk dih lai. Cu an cawnmi an kutzung pawl cu zuar a si lai i 30% hi khua thanchonak caah hman a si lai i 70% cu riantuan mi nih an hmuh ve lai, amah nih amiak mi aa lak lai lo. Hi a sakmi thawng in ramdang mi tampi an ralai i khuachung ah tangka tampi a lut ve lai. Ramdang holh let piaktu hna zong tampi herh a si te lai” tiah sipin committee Pu Biak Tha Cung nih TCP ah a chim.

Daw Tin Tin Lwin nih Hotel Zone saknak caah hmun a halmi hna cu Tlangrua lam Pawhte rawn, Thinghual tlang ah avoi khathnak March 16 ah rak zoh a si nain tutan ah hmun an peknak hmun cu Sopum lam chak, Calvary Hlawhtling thlacamnak hmun thlang te ah a si. Hi hmun ekah 11 chungah inn 30 tluk sak aa tim tiah theih a si.

Hi Hotel zone cu tukum June thla in sak thok a si lai i November thla ah dih i December thla hrawng ah hunnak tuah an tim tiah kan theih. +++