Thantlang Kahdohnak Ah Kaphnih Lei A Thi Mi An Um
The Chinland Post | 2023 October 13 — Chin ramkulh, Thantlang khua ah SAC ralkap le CDF, CNA phufonh hna karlak ah October 12 in kahdohnak a fak i kaphnih lei a thi mi an um tiah theih a si.
October 12 zinglei in kahdohnak a fah hi a si i CNA, CDF phufonh lei in 2 an nunnak a liam i 3 hliam an tuar. SAC ralkap 3 an thi ve tiah hriamtlai pakhat nih a chim.
Kahdohnak chung ah CDF-Hualngoram in hriamtlai Khuang Ceu Thang (kum 24) le CNA ralkap Hram Ceu hna nih ram le miphun caah an nunnak an pek. Hliam a tuar mi pathum hi an thlop lio hna a si tiah theih a si.
Thantlang khu, a luancia Oct 10 ah kahdohnak a rak chuak cang i SAC ralkap nih sizung le sianginn pawl hna ah kahdohnak vanlawng 2 in bom lung 6 a thlak bantuk in hriamngan zong in voi tampi a kah tiah theih a si.
Ralkap nih hramhram in uknak a lak hnu thawk in Thantlang khua ah 2021 September 18 thawk in kahdohnak a rak chuak. SAC ralkap nih Thantlang khua ah voi tampi kahdohnak a tuah caah khuami dihlak nih innlo an zaamtak i a pawngkam khua pawl le India, Mizoram hna ah an va i dor cio hna. CNF le CDF zong nih Thantlang khua a dihlak in uk/tlaih khawh nakhnga an i zuam cuahmah tiah theih a si.
