Thantlang Khua Aung San Milem Le Bogyoke Pangpar Dum Tuahnak Rian An Thok

Salai Elvis| September 26| Thantlang khua chung Aung San milem cu sing 75 dih in ser ding le Bogyoke pangpar dum tuah ding rian cu September 2018 tu thla zarhthumnak hrawng khan sipin committee nih riantuan hram an thok cang tiah theih a si.

Hi rian cu tu thla September in rian dih cang ding a si nain riantuantu an um lo caah ramkulh sinah ruahnak an hal hnu ah September 19 Thantlang khuanu/pa, Hluttaw palai hna le cozah lei tuanvo ngeitu hna hnatlaknak le sipin committee nih tawlrel dingin riantuan hram an domh than hi a si.

“Bogyoke pangpar dum le a milem tuah ding cu sipin Committee nih kan tawlrel lai. A tu hi milem zong kan cah lio a si a dir lio pe nga tluk a sangmi a phurhman he sing 75 a dih lai. A tangmi cu pangpar dum tuahnak caah lam cawhnak le a muisam suainak caah hman a si lai i tu thla chungah kan lim lai. Milem tu cu a rau deuh lai caah October thla dih lei ah khin cu hmun ah cun chiah a si lai.” tiah sipin Committee Chairman Pu Ram Khar nih TCP ah a chim.

“Budget rak hal lio ah Aung San milem le pangpar dum tiin an rak hal mi a si. A si nain khuami cheukhat zong nih an doh bu in tuah chih phung zong a si lo tikah hi budget cu a kir than ah cun khua mi an sungh lai caah sipin Comiitee le khuanu/pa hna nih tawlrel dingin Can binate meeting ah bia kan chah.” tiah sipin vuanci nih September 11 ah a rak chim.

Hi hmun cu cusu-bar-ih chak, phungki sianginn hnulei ah a um mi a si i sipin nih rak humhak cia cang mi ekah- 5 tluk a kau mi hmun a si. Hi pangpar dum cu (zero Degree) muisam in tuah an timh i hi hmun ah zalong tein tar le ngakchia zong lam len khawhnak hmun le Cycle (seh-bing) citnak zongah hman chih khawh ding tiangin timhtuah nak an ngei.

Aung San milem le pangpardum tuahnak ding caah ramkulh sipin budget sing 300 dih in rak hal mi a si. Bogyoke Aung San milem chiahnak kongah Thantlang zatlang bu kipfonh hna nih duhlonak ca zong sipin vuanci sin ah an rak tial bal. Hi tangka hman dingmi zaka ah khuathanchonak le hi rianthok hlan ah khuami hna hmuh ning le duhnak laknak zong an tuah ta hmasa a herhnak kong fakpi in an rak doh bal tiah theih a si.+++

Na ruahning rak langhter ve.. (Leave a comment)

%d bloggers like this: