Thantlang Khua Aung San Suu Kyi Nih Facang Le Chiti Bawmhmi An Phawt Zamh Cang Hna
Salai Elvis| 2019 February 1| January 20 ni ah Rampi ruahnak petu Daw Aung San Suu Kyi nih Thantlang khua facang tun 100 le Chiti cuai 100 bawmhnak a pekmi cu January 30 ah Pumtlamtlinglo le ngaktah tel in hmun dangdang ah bawmhnak an pek cang hna tiah kan theih.
An phawtzamh ning hna cu Thantlang khuachung sangthen 3 caah Facang tun 25 le Chiti cuai 20, Pumtlamtlinglo hna caah Facang tun 20 le Chiti cuai 10, MFOC le PCH ngaktah cawmnak hmun ah Facang tun 10 veve le Chiti cuai 10 veve, Congthia khua ngaktah zohkhenhnak caah Facang tun 10 le Chiti cuai 10, Na-ta-la sianginn Facang tun 5 le chiti cuai 10, Thantlang Baptist Church (TBC) Facang tun 10 le Chiti cuai 10, Thantlang phunki sianginn le Lungler khua Phungki sianginn ah Facang tun 5 veve le Chiti cuai 5 veve tiin Pengukzung, khuanu/pa le tuanvo ngeitu hna nih an phawt zamh hna.
“Sangthen pathum chungah Facang tun 25 le Chiti cuai 20 an kan pekmi hi sangkhat ah Facang tun 8 cio kan i then hna i tun khat a hlei caah sangthen No.3 tu hi kan chap hna. Cun Chiti zong sangthen No.1 ah cuai 7, No.2 ah Cuai 7 le No.3 ah hin cuai 6 tiin kan i phaw than. Kan mah sianginn sang hi sangthen 4 ah kan thenmi chungah sangkhat tun hnih cio kan pek hna i an mah le sang cio (se-ing-hmu, za-ing-hmu) nih a harsa taktak mi lawng nan pek hna lai kan ti hna i sangkhat ah inn 4 in tuntan cio le Chiti zong Facang a ting lo mi hna kha cuaikhat cio pek an si ve” tiah No.1 khuabawi Pu Van Tlir nih TCP ah a chim.
Chaklei Chinram chung Aung San Suu Kyi nih Facang le Chiti a hlut ciomi hna cu mah le khua cio tuanvo ngeitu hna nih an mah le an thiam ning cio in phawtzamhnak an tuah cio hna i hi chungah a bik in sifak santlai lo deuh, ngaktah, pumtlinglo hna, biaknak dang thleidannak um lo in bawmhnak an pek cio hna tiah kan theih.
About The Author
