Thantlang Khua Chung Zanlei Suimilam 4 Tiang Dawr On Khawh A Si Cang
TCP-Thantlang|1 June 2020| COVID-19 ruangah thlakhat chung dawr on caan zing suimilam 5 in chun suimilam 12 tiang lawng on ter a rak si mi Thantlang khuachung dawr cu June 2 thok in zing suimilam 5 in zanlei suimilam 4 tiang dawr on caan sauh piak an si cang.
June 1 ah Cozah lei rianngei tu hna le COVID-19 Committee hna nih a tubantuk in zulhphung suaisam mi cheukhar an dorh deuh hi a si.
Cu zulhphung chungah an dinhdorh piak mi hna cu; zinglei suimilam 5 in zanlei suimilam 4 tiang dawr hngah khawh a si cang nak, a si nain ngandamnak zung nih nawl a chuah mi he kalh lo in le dawr ngei tu le a cawtu hna kar ah pe 6 dan in thil i cawk ding. Suimilam 4 tlin in dawr khar dih ding (siikhan le siidawr tel lo).
Mah pin ah zing suimilam 5 in zanlei 4 tiang anhringso, Ar le thilri phur motor poah a caan chung te lawng ah thil thlak ding le duh poah in khuachungah zan riah lo in rianngeitu nih rikhiah nak hmun No.1 motor gate hmun ah riah a si lai nak kong zulhphung dinhdorh a si.
Mahpin ah mibu umnak hmun a si mi Pumpululh chuihnak hmun, View Point le Public area hmun ah kal lo ding le Picnic tibantuk tuah lo ding, A si khawh chung in, inn chungah um rih ding a herh tuk i leng na chuah caan le Dawr kal tikah hmurhuh (mask) i huh ding, aa hup lo paoh 5000 liam ter silo ah upadi ningin dantat a si lai nak kong, Zawtnak hmun in a ra mi paoh tlun inn onh hna lo ding le rianngeitu sin ah thawngthanhnak tuah ding kong le a dangdang zulhphung a um cia rinh mi zong an um.
About The Author
