Thantlang Khua Dinti Lakmi 2020 Kum Chin Miphun Ni Ah Hunnak Tuah Dingin Timtuahnak An Nei

Salai Elvis | 2019 October 3| — Ara lai mi 2020 kum Chin Miphun ni ah Thantlang dinti lak mi cu hunnak tuah dingin ramkulh cozah nih timhtuahnak an ngei tiah tuanvo ngeitu sinin kan theih.
2018-2019 budget kum ah rian rak auh mi Thantlang dinti lakmi rian cu ramkulh sipin Department nih tlaih in 2019 September thla in riantuan an thok cang. Hi rian cu a tambik thla li tluk lawng caan lak in rian an tuan chuah dih lai tiah theih a si.

“Thantlang dinti cu December 31 rian dih dingin timhtuahnak ngeih a si. Pipe zong zatuak 100 a phan dih cang. Tilam zong khan (meng) 20 tluk cawh ding rian an thok lio pi a si. Cu zong cu December 31 ah dih ter ding ti a si nain, tlang cung a si tikah lunglak le a harnak tete zong a um caah 2020 January thla chungah dih ding in timhtuah a si. October, November, December hi thlathum chungah rian dih ding timhtuah nak (plan) suai a si i January thla khi cu a dih lo sual ah tiah (a-yan) ah kan i chiah mi a si i a dihlak thla li le cheu tluk caan a um rih. Cucaah Febuary 20 a voi 72nak Chin Miphun Ni ah hunnak tuah kho dingin timhtuahnak zong ngeih a si. ”tiah sipin vuanci nih The Chinaland Post ah a chim.

Thantlang dinti laknak ding caah 2018-2019 budget kum ah ramkulh cozah nih a dangtein pekmi 1.2 billion, Na-ta-lah nih (0.6) a bawmh than caah 1.8 billion dih in le riantuan dingin Tender auh a si nain mizei Company hmanh Survey an awn lo ruang, a lam hlat caah le riantuan an ngamh lo caah a tu bantuk in ramkulh sipin Department nih tuanvo a lak hi a si. 1.8 billion lawng nih a nguh ding a si lo caah khuachung ti inn saknak le phawtzamhnak caah tiin 2019-2020 budget kum ah 1.1Billion pek chap hna caah a zapi 2.9 billion tluk dih in rian an tuan hi a si.

Hi dinti laknak hmun cu Thantlang in khan(meng) 19 le falong 6 aa hlatnak hmun, Falam peng Hrianghnang khua le Thantlang peng Sihcang khua kar ah a luang mi Khuava ti a si.

Leave a Commnet

%d bloggers like this: