Thantlang Khua Dinti Laknak Thilri A Phan Cang; Pehzulh In Riantuan An Thok Cang Lai

Salai Elvis|2019 September 9| Thantlang khua mi nih an i hngahhlang ngaimi dinti laknak ding caah thilri cheukhat a phan cang i pehzulh in riantuan zong an thok cang lai tiah tuanvo ngeitu pakhat sinin kan theih.

“Thilri phurhtlunh tu le a khawmsua tu ding caah ramkulh cozah nih tender an auh i Jinis Instructure Company nih an hmuh caah thilri zeimawzat zong Thantlang a phan cang. Mah dih in ti lam cawh zong tutan zarhchungah kan thok colh lai. Cun thilri zong kan thiar colh lai i pehzulh in rian kan tuan cang lai.” tiah sipin Committee Chiarman Pu Ram Khar nih TCP ah a chim.

Hi dinti laknak ding caah ramkulh cozah nih Tender a auh i Company cheukhat nih Survey tuahnak chungah ho hmanh an awn lo caah le an tlamtlin lo caah, Cun hmunhma a hlat tluk in budget a tlawm caah an ngamh than lo nak kong ruangah riantuan an hnut deuh hi a si. Cucaah hi rian cu ramkulh sipin Department nih tlaih in rian an tuan hi a si.

“Ti hna laknak ding caah tangka nih a nguh deuh lai lo kan ti caah 2019-2020 budget kum ah 1.1 billion an kan chapthan caah Ti hna in khuachung a phak tiang le sangchung thenphawtnak vialte a dihlak 2.9 billion hi hman a si lai. Cun ti khonnak Galon 100,000 a tlum mi, cun Galon 50,000 a tlum mi pahnih/thum hrawng sak chih a si te lai. A sinain zeitluk dah a herh lai timi Structure Design a chuak rih lo.” tiah a cunglei upa nih a chimchap.

Hi tindi laknak ding caah 2018-2019 tangka kum ah ramkulh cozah nih a dangtein pek mi 1.2 billion le Na-ta-lah nih 0.6 Billion a bawmh than i a zapi 1.8 billion le 2019-2020 tangkam kum chungah ramkulh cozah nih 1.1 billion a chap than hna caah a dihlak 2.9 Billion dih in rian an tuan lai.

Hi dinti laknak hmun cu Thantlang in khan (meng) 19 le falong 6 aa hlatnak hmun, Falam peng Hrianghnang khua le Thantlang peng Sihcang khua karlak a um mi, Khuaiva ti an lak lai. Hi dinti laknak caah GI Pipe a tha phun hman a si lai tiah kan theih.+++