Thantlang Khua Tanghra Sunghawn Thatkhawhnak Ding Caah MEC Nih Cachimtu A Thlahpiak Hna

Salai Elvis| 2018 Tho 18| Myanmar Education Center (MEC) tawlrelpiaknak in Thantlang khua tanghra sunghawn a thatnak ding caah tiin cachimtu saya/mah zarhkhat ah minung pahnih lengmang Thantlang khua ah an rak thlah hna tiah theih a si.

“MEC nih cachimtu saya/mah te rak thlahpiak dingin an rak kan pehtlaih tikah a tha tuk ko tiin kan cohlan hna. Tanghra lawng chimh an si i zarhkhat ah minung pahnih lengmang an rak thlah hna. Minung pahnih nih anmah le tlaihmi subject cio zarhkhat chung an chimh hna dih in an kir i zarhkhat chung ca a dang pahnih an vun thlah than hna, an i thleng lengmang. A bik in tanghra sunghawn thatnak ding caah tuahmi a si” tiah BEHS No.1 siangukbawi Ing Cem nih TCP ah a chim.

Saya/mah an rak thlahmi hna nih August 26 in cachimh an thok colh i 2019 February thla tiang an chimh cawnpiak hna lai. An rak thlahmi saya/mah hna cu Boarding School (asawng) min thangmi hna i cachimtu pawl an si tiah theih a si.

“Kanmah lei nih kan dih heumi cu saya/mah pahnih le an lutlai pakhat an si i zarhkhat chungah singkhat renglo deuh kan dih ve. Hi kongah an cachimh ning cu a tha ko, siangngakchia te nih an i lak khawh le lak khawh lo tu a si lai. Tanghra siangngakchia 100 chungah ca a duh takmi minung 30 caah hin a tha lai tiah ka ruah. Micheu siangngakchia cu dawtnak in an kan tuahpiak mi a si ti a hngal lomi zong an um” tiah siangukbawi Ing Cem nih TCP ah a chim.

Cachimtu ah an rak thlahmi hna cu BEHS No.1 le No.2 tanghra siangngakchia caah a si i anmah le an caan cio zoh in mah tanghra sianginn pahnih ah i chawng in ca chimh an si. Kawlram chung tanghra sunghawn zatuak zoh tikah Chinram chung hi a chiami cazin ah aa tel i Chin ramchung lila ah Thantlang peng hi a chiami chungah aa tel pengmi a si. Thantlang peng 2018 cacawn kum tanghra sunghawn ah nu 21 le pa 17 an zapi 38 an awng i zatuak 12.71% an si.

Na ruahning rak langhter ve.. (Leave a comment)

%d bloggers like this: