Thantlang Khua Tint Tint Lwin Hotel Zone Riantuantuding Training An Pek Hna
Salai Elvis| 2018 July 26| Tint Tint Myanmar Group of Companies nih Thantlang khua ah Hotel Zone tukum chungah sakdingin timhtuahnak ngeih a si cang caah riantuantu ding cawmpiaknak July 26 in August 4 tiang ni 10 chung an ngeih hna lai tiah theih a si.
Hotel kong he pehtlai in riantuan thiamnak le rian thiam herhmi tete ahlankan in cawnpiaknak cu Thantlang khua chungmi lawng si lo in khuate lei minung tel in 50 tluk cawnpiaknak an ngeih hna.
“Hi cawnpiaknak cu ni 10 chung cawnpiak an si lai. Hi chungah khualdon ning, rawl chumhchuan ning, ihnak khan tuahto ning, le a dangdang rian phun chimh an si lai. Kawlrawn ummi lawngte cu a si khawh lo caah hika khuachung ummi sin ah rian chimh i cawnter an si hna. Ni 10 chung an cawn dih hnu Hotel Zone inn an lim tikah voikhat training pek an si rih lai. A kaimi chungah minung pazeizat dah rian pek an si lai a fiang rih lo” tiah Tint Tint Myanmar Group of Companies tuanvo ngeitu Ma Hsu Hnin nih TCP ah a chim.
Tutan nihra chung cawnpiaknak ah rian phun riat cawn le chimh an si rih lai tiah theih a si.
“Tutan cawnpiaknak ah a rak kaimi hna hi Thantlang khuachung lawng an si lo khuate lei minung zong an tel. Cawnpiaknak ah kai a duhmi kai khawh a si ti zong ahlankan in cazual kipah theihternak kan tuah hnu ah minung 50 tluk an rak kai kho. Atu a kaimi hna hi an zapi in rianpek an si lai lo” tiah Thantlang lei tawlreltu Pu Lawm Bik nih TCP ah a chim.
Hi Hotel Zone an saknak ding cu Sianginn sang Sopum lam, Hlawhtling thlacamnak hmun thlang ah Thantlang khuami nih ekah 11 hmun pek a si cang. Mah Hotel zone cu tukum December thla hrawng ah hunnak tuah an timh tiah kan theih. +++
About The Author
