Thantlang Khua Vok An Thih Tuk Caah Market Ah Vok Pumkhat Nithum Tiang An Zuar Caan Um

TCP-Thantlang|2020 April 6| Thla khat chung tluk Thantlang khuachung ah Vok pulh rai a tlung i sa a caw mi an tlawm tuk caah Market sa zuar mi nih Vok pumkhat ni thumchung tiang an zuar caan zong a um tiah theih a si.

Zarh khat chungah a tlawmbik Vok 6 thah in zuar tawn mi Thantlang Market cu a tu lio ah cun Vok an pulh in an thih tuk caah zuar khawh ti lo in harnak fakpi an ton hi a si.

“Zawtnak um hlan ah cun zarhkhat ah vok 6/7 hi cu kan thah peng ko. A tu lio ah cun vok ngan deuh, sum 6 hrawng hi cu zarhkhat ah pa hnih lawng kan thah khawh cang. A ngan deuh mi hna bang cu tikhal kuang ah kan chiah i Vok pum khat khi nithum chung hna kan zuar can a um.”tiah sathahnak tlai tu Nau Cung nih TCP ah a chim.

Hi kong he pehtlai in Thantlang khua saram thlop bulnak zung lei zong nih a hlankan runvennak sii (ka-kuai-sii) ‘Hog Chlolera’ timi Virus thahnak zong Vok 1000 reng lo an chunh piak cang hna.

“Atu lio Vok zawt rai hi zeiruang bik ah dah a si ti cu kan hngal rih lo, khua caan ruang ah a cang mi a si lai tiah ruahdamh a si. A si nain a hlankan runvennak sii a si mi ‘Hog Chlolera’ timi zong vok 1100 sinah kan chunh piak cang hna. Hi sii cu Vok a zaw tuk cang mi, sii va chunh mi pawl khi cu an dam tuk ti lo, an thi than ko.”tiah Saram siibawi Lian Bawi nih TCP ah a chim.

Hi Vok zawtnak cu a luan cia Febuary thla dih lei in aa thok i April thla thok tiangah Vok 50 hrawng an thi cang tiah theih a si.

Vok Zawtnak Kongah Ralrinawk

Atu lio Thantlang nih an ton cuahmah lio mi Vok pulh rai in a thi mi Vok pawl zeitin dah kan phum lai, Vok sii chunh mi nih rian a tuan lio caah ah minung nih dinei sual lo nak kong cu Saram siibawi Lian Bawi nih a tanglei bantuk in a chim.

Atu lio Vok a zaw mi hi thli in ai chonh mi a si lo, Vok a zawtnak hmun a si loah Vok a thihnak hmun ah Minung, Ar le Uico tibantuk an kal sual i na zuat mi Vok sin na va kal than tikah na ke bal, na tonghtham mi siloah a ti, hang tibantuk in chawnh mi a si.

Vok a zaw mi sa, minung nih theih lo in ei sual tikah eibang le a hleimi a ti, hang pawl kha Vok rawl pek than sual ah cun fawi tein Vok dang chawnh khawh a si.

Vok A Thi Mi Zeitindah Kan Tuah Lai?

Na Vok a thih sual ah cun, a si khawh chungin Vawlei tang ah phum ding, khua lengah hlonh le phum lo ah a tha, a ruang cu na kal pi lio ah a ti, hang a zuh sual a si i Uico le Ar nih an tongh in midang Vok sin ah chawnh khawh than a si caah mah le dum chung cio ah vawlei cawh in phum colh ah a tha bik. Vok a thi mi cu Tiva le Horkuang ah hlonh sawh lo ding.

Vok Sii Chunh Cang Mi Sii-ai Nih Rian A Tuan Lio Ah Minung Eiding Ah Ralrin Awk

Saram kip sinah a hlankan runvennak sii chunh khawh mi sii phunkhat a si ‘Penicilin’ siloah ‘Penstrep’ timi sii phuan kha Vok a si loah Saram a zaw mi pakhatkhat sin ah na chunh tikah, sii na chunh hnu in ni 21 hnu lawngah a Sa tit deuh pawl ei khawh a si cang. (ni 21 tlin hlan ah a sa tit ei lo ding). A chungril tu cu ni 45 hnu lawngah ei khawh a si. Cun hnuk ngeimi a si ahcun sii na chunh ni 3 hnu lawngah a hnuk din khawh a si. Theih lo sual i sii chunh cangmi saram, a sii nih rian a tuan chung caan ah minung nih eisual ah cun minung ca zongah tih a nung i saram dangdang zong minung nih chawnh khawh than a si. Atu lio Vok zaw mi khamnak caah chunh mi sii ‘Hog Chlolera’ tu cu ni 7 tiang lawngah hngah a hau mi phun a si tiah Thantlang peng saram zunglutlai le sa ram siibawi a si mi Lian Bawi nih April 6 The Chiland Post he tonbiaruahnak ah a chim.