Zarhkhat Chung Thantlang Ah Phungninglo Cycle Mawngtu Sin In Ks. 360,000 Dantat An Si Manh Cang
Salai Elvis| 2018 June 12| June 4 ni in Thantlang khuachung ah phung ning lo cycle aa cittu hna minung 12 sin in ks. 360,000 dantatmi tangka an liamter cang hna.
Penguk zung hruainak in Thantlang khuachungah cycle le motor khawndennak a zordeuh nakhnga lam zulhphung le a bik in cycle/motor a mongmi hna sin ah ralrin peknak le cawnpiaknak zarhkhat chung ngeih hnu ah June 4 thawk in a tubantuk zulhphung zul duh lomi dan an tat hna hi a si.
Zulhphung a zul lo mi chung in motor hi an i teltuk lo. Cycle deuh tlaihmi an si i June 4 ah minung 3, ni 5 ah minung 3, ni 6 nak ni ah minung 4, ni 7 ni ah minung 1 le ni 8 ni ah minung 1 tlaih an si i biaceih zungah chuahpi hnu ah tangka liamter an si. Tazacuai mi 12 chungah 11 hi luchin aa chinh lo mi le 1 hi cycle pakhat ah minung 3 aa pherh mi an si. Hi hna pawl cu Motor PK tlaihmi upadi ma-ta-yah (62) ningin tazacuai hnu ah tangka liamter an si.
“Luchin aa chinh lo mi le minung pathum aa pherh mi hi tangka liamter mi zat hi aa khat i 30000 cio an si dih” tiah motor PK Sai Khaw Let nih TCP ah a chim.
2018 kum canceo Thantlang khuachung ah motor/cycle khawndennak voi 6 a chuak i minung pakhat a thi cang tiah palek sakhan cazin ningin theih a si. ++++
About The Author
