Thantlang Khuachung A Vak I Hmurhuh Aa Hup Lo Mi 5000 Dantat Le Khualtlawn Kal Duh Mi Nih Sangchung Khuabawi Sinah Theihpinak Ca Lak Ta Ding
TCP-Thantlang| 1 May 2020| COVID-19 i runvennak caah tiin Thantlang khuachung ah aa chok mi paoh nih Hmurhuh (Mask) i huh dih ding le rianherh tuk ah khualtlawn kal a duh mi hna nih sangchung khuabawi sin le cozah zung lutlai hna sin ah theihpinak ca lak ta ding kong penguk zung nih nawl a chuah cang.
Aherh tuk i khuachung chawh le dawr kalnak paoh ah hmurhuh (Mask) i huh dih ding timi cawnpiaknak caan cu a dih cang caah May 1 ni thok in nawlngai lo paoh minung pakhat Ks. 5000 dantat nak tuah a si cang lai. Cu i nawlzul duh lo paoh upadi ningin dantat a si lai nak kong Thantlang penguk zungnih May 1 ni ah thawngthanhnak a tuah.
Mah pin ah rian herhhai tuk in khawltlawn kal a duh mi hna nih sangchung khuabawi hna sin ah le cozah riantuan tu an si ah cun zung lutlai hna sin ah theihternak tuah ta ding kong thawngthanh mi ah aa tel chih.
“Hi zawtnak kong he pehtlai in thilphur motor zong chun suimilam 12 tiang lawng khuachung ah thil thlak ding le suimilam 12 hnu ah thilthak khawh a si ti lonak kong, suimilam 12 hnu ah dawr ngeitu nih herh tuk mi a um ah cun an mah te in khua lengah an i lak lai.”tiah No.2 khuabawi nih TCP ah a chim.
About The Author
